Dušše moadde boandda Norggas čavgejit boahkána go vudjet tráktoriin, čájeha ođđa iskkadeapmi. Bissovaš boagángeavaheapmi go vuodjá tráktoriin berrešii leat 2021 ođđajagelohpádus, ávžžuhit fágaolbmot.
Dušše 13,6 proseantta boanddain geavahit álo vuojánboahkána go vudjet tráktoriin dahje eará bargovuojániin masa sihkkarvuođarusttegat leat biddjon, čájeha Agri analyse iskkadeapmi man Landkreditt lea sis tiŋgon. 33,9 proseantta muitalit sii dábálaččat čavgejit dan iežaset birra.
– Dat máksá ahte lagabui bealis leat govttolaš buorit dábit das, muhto dušše okta čieža olbmos geavaha dan álo, lohká Landkreditt Forsikring hálddahuslaš direktevra Ane Wiig Syvertsen preassadieđáhusas.
36,7 proseantta vástidedje ahte sii muhtimin geavahit boahkána, ja 11,6 proseantta ges vástidit sii eai goassege geavat dan. Earát vástidedje ahte ii leat sidjiide áigeguovdilis ášši. Ane Wiig Syvertsen lohká das lea buoridanmunni ja ávžžuha buohkaid eanadoalloealáhusas geavahišgoahtit boahkána go dat sáhttá gádjut heakka ja dearvvašvuođa.
– Eanadoallu lea daid ealáhusaid gaskkas mas lea eanemus jápminlihkohisvuođat go geahččá bargiidlogus. Min logut čájehit ahte birrasii bealli buot jápminlihkohisvuođain dáhpáhuvvet tráktorvuodjimiin, lohká Bargobearráigeahču eana- ja vuovdedoalu riikaviidosaš heiveheaddji Heidi Synnøve Blekkan.
