Mátta-Várjjaga doalvesearvvi Dag-Kåre Alme lei birgetmeahttun iežas heasttain ievttá doalvegilvvuin Kárášjogas.
Kárášjoga doalvesearvi lágidii ikte doalvegilvvu jieŋa alde dán guovllu árbevieru mielde. Dán jagáš doalvegilvu doalvegeainnus lei oktiibuot 300 mehtera guhkki.
Mátta-várjjatlaš birgetmeahttun
Galbmavarat luohkás ledje guokte gilvvu, oktiibuot vihtta heastta. «Bjørnli Lykka» oktan kuskkain Dag-Kåre Alme beasai finálii. Nuppi gilvvus galggai «Vinn Igel» kuskkain Johan Mikkel Buengain gilvalit «Dæmrogutten» vuostá. Kuska galggai lean Mátta-Várjaga doalvesearve lahttu John Stillerud, muhto son oaččui Dag-Kåre Alme kusket «Dæmrogutten» mii beasai finálii. De fertii John Stillerud ieš kusket «Dæmroguttena» «Bjørnli Lykka» vuostá. Dæmrogutten lea dakkár mii láve muhtimin bisánit, iige vuollán vuolgit gilvalit. Illá oaččui John Stillerud heastta johtui nu ahte beasai gilvalit. «Bjørnli Lykka» joavddai mealgat ovdabeal «Dæmroguttena» mollii ja vuittii.
– Dæmrogutten lea nu gilvoviššal. Otne dat njolggistii ja lei nivssálaš. Das lei várra heajus beaivi, čilge eaiggát John Stillerud gii ovdal lea fitnan Kárášjogas gilvaleamen.
– Heasta lea hui garas ja Stillerud ii birgen doallat dan. Mun ledjen gievrrat go heasta ja danin vudjen dan, čilgii Dag-Kåre Alme maŋŋá dasa go Dæmrogutten gal doalvvástii bures go Alme lei kuska, son lea oainnát heastta hárjeheaddji.
Heasttat mat gilvaledje; Bjørnli Lykka, Prinsesse Leia, Fraun Vinta, Vinn Igel, Dæmrogutten
Lieggavarat vovnnain
Lieggavarat árábárheasta luohkás ledje njeallje gilvvu, oktiibuot gávcci heastta, ja juohke gilvvu falimus beasai loahppagilvui.
Šattai garra gilvu, muhto Nystad heasta «Lindy Match» vuittii ovttain heasttaoaivvi guhkkodagain ovdabeal Kristian Solbakken heastta «Pas På S.H.».
– Vuiten Lindy Matchain ja ledjen dál gal lean hui ilus. Hui somá ruovttu gilvvus vuoitit, illuda Nystad.
Heasttat mat gilvaledje; Vudu Barsk, C.C. I Am Sofie, All By Myself, Lindy Match, Couer Photo, Tami Mosebo, Love of Order, ja Pas På S.H.
«Monte» luohkká
Doalvegilvu lei maid «Monte» (riiden) luohkás sihke lieggavarat ja galbmavarat heasttaid gaskka. Seamma heasttat mat gilvaledje vovdnaluohkáin, gilvaledje maid «Monte» luohkás, muhto eará kuskkain.
Lieggavarat Monte luohká vuittii Johan Mikkel Buen heasta «Vudu Barsk» riidejeaddjiin Silje Marjavara Pedersenain.
– Otne lei Vudu Barsk hirbmat buorre, lohká 17 jahkásaš Silje Marjavara Pedersen ja muitala son lea jagi riiden Monte ja vuoitán vuosttaš geardde dákkár gilvvus.
Galbmavarat Monte luohká vuittii maiddái Dag-Kåre Alme heasta «Bjørnli Lykka» man riidejeaddji lei Julie Pettersen.
Doalvelihttu lei juolludan Kárášjoga doalvesearvái 50.000 kruvnna vuoittuide.
Kárášjoga doalvegilvvu 2015 bohtosat:
Sulky lieggavarat:
1. Lindy Match, kuska: Toralf Johannes Nystad
2. Pas På S.H., kuska: Kristian Solbakken
3. Vudu Barsk, kuska: Johan Mikkel Bueng
Couer Photo, kuska: Kristin Andersen
Sulky galbmavarat:
1. Bjørnli Lykka, Kuska: Dag-Kåre Alme
Dæmrogutten, kuska: John Stillerud
Monte galbmavarat:
1. Bjørnli Lykka, riidejeaddji: Julie Pettersen
2: Fraun Vinta, riidejeaddji: Maret Inga Smuk
Monte lieggavarat:
1. Vudu Barsk, rytter: Silje Marjavara Pedersen
2. All By Myself, rytter: Maret Inga Smuk
3. Lindy Match, rytter: Biret Inga Guttorm Somby
4. C.C. I Am Sofie – njolggistii
