Bivvalat leat dagahan Troanddima gávpoga muohtaheapmin ja Sámi Valáštallanlihtu nubbijođiheaddji Per John Anti lohká sin ožžon duorastaga dieđu ahte heargevuodjinšovva ii šatta.
Tråante2017 doaluid oktavuođas lei SVL-N ráhkkanan čájehit heargešovva, gaskavahkku guovvamánu gávccát beaivvi, masa leat ráhkkanan beannot jagi.
Duorastaga oaččui lihttu dieđu lágideddjiin ahte eai sáhte čađahit šovva.
Garrasit behtton
Beahtahallan Per John Anti lohká sin ožžon dieđu ahte lágideaddjit eai nagot buvttadit muohttaga go lea nu bivval ja šaddá divrrasin viežžat eará sajis.
– Gal dat lei váivi, go mii leat bargan jo beannot jagi dieinna ja ásahan maiddái sierra bargojoavkku dasa. Lihttu lei maiddái ožžon olbmo vuolgit dohko guđain herggiin oktan vuddjiin, čilge beahtahallan Anti.
Duššás geavahan navccaid
Anti lohkáge sin dál geavahan duššás ruđa ja maiddái návccaid.
– Mii ozaimet maiddái boazodoallošiehtadusa bokte ruhtadeami hearggástallamii ja oaččuimet 300 000 kruvnnu, muitala son.
Čađahuvvojit
Sámemeašttir čuoigangilvvut ja njoarosteapmi goittot galget čađahuvvot nu go plánejuvvon. Čuoigangilvvut lágiduvvojit bearjadaga.
– Mu dieđu mielde galgá leat doarvái muohta čuoiganstadionis ja njoarostangilvvuide ii dárbbaš muohta, dadjá Anti.
(Ášši joatká gova vuolábealde)
NN-gilvvut Romssas
SVL-N Norggameašttirgilvvut goittot lágiduvvojit maŋit vahkkoloahpa Romssas.
– Dat lei maid stellejuvvon dien vahkkolohppii goas álbmotbeaivi lea, muhto fertiimet bidjat vahkkoloahpa ovdalii Tråante doaluid dihte, dadjá son.
Hástaleaddji
Tråante2017 doaluid prošeaktajođiheaddji Ida Marie Bransfjell mielas lea issoras šállošahtti go eai beasa čađahit heargevuodjima.
Dasa lassin ballet ahte eai beasa čađahit čuoigangilvvuidge.
– Mun ádden ahte SVL-N lea beahtahallan, go mii leat seamma beahtahallan. Dieđán maid ahte sii leat geavahan ollu návccaid plánemii ja ráhkkaneapmái, go mis lea leamaš buorre gulahallan vuosttaš beaivvi rájes. Min mielas lea maiddái váivi go eat beasa čađahit heargevuodjima, man jáhkán lei geasuhit ollu olbmuid, dadjá Bransfjell.
Muohtavádni
Bransfjell lohká bivvaliid dagahan váttisvuođaid olles Troanddima gávpoga čuoigansuorgái.
– Buot čuoigangilvvut soitet bissehuvvot muohtaváni dihte. Dat lea njulgestaga roassun, dovddasta son.
