Ealgabivdu guhkiduvvo Guovdageainnus ja Kárášjogas.
Finnmárkku fylkkagieldda Luonddu- ja birasossodaga ráđđeaddi Jostein Fløgstad duođašta ahte ealgabivdu guhkiduvvo Kárášjoga gielddas ja Guovdageainnu suohkanis.
– Mii leat ožžon ohcamiid guhkidit bivddu Kárášjoga lulábealde ja mii leat mearridan guhkidit golggotmánu ovccát beaivái, dadjá ráđđeaddi Jostein Fløgstad.
Ovdagihtii ohcan
Guovdageainnu suohkan sáddii njukčamánus ohcama guhkiduvvot.
– Guovdageainnu nuorttalulabealde leat mearridan guhkidit bivddu, dát mearrádus dahkkui njukčamánu viđát beaivvi, nu ahte dát mearrádus lea dahkkon ovdagihtii. Bivdu guhkiduvvo golggotmánu 15. beaivái, dadjá Fløgstad.
Bivdoearri
Guhkidit bivddu go eai leat nagodan bivdoeari mii lea biddjon guvlui.
– Sivvan manne bivdu guhkiduvvo lea ahte bivdit eai leat nagodan báhčit nu olu elliid guovlluin gos dál guhkiduvvo bivdu, dadjá ráđđeaddi Jostein Fløgstad.
FeFo lea dán jagi fállan ealgabivddu oktiibuot 279 ealgabivdoguovllus gos oktiibuot besset njeaidit 1010 ealli.
Kárášjogas lea bivdoearri 233 ealli ja Guovdageainnus 120 ealli.
Kárášjogas leat gaskavahku iđida dieđihuvvon báhččon 164 ealgga ja Guovdageainnus dieđihuvvon báhččon 55 ealgga.
