Mearrasámi guolleorganisašuvdna bivdá Norgga Njuoskaguollesearvvi iskat šárkaguollebivdiid bargodili.
Mearrasámi guolleorganisašuvdna «Bivdu» cealká reivves ahte Norgga Njuoskaguollesearvi berre iskat movt buoridit dili.
Bivdu cealká ahte dain unnimus fatnasiin Finnmárkkus ii leat doarvái buorre ortnet mii láhčá nu ahte besset gurret ja sáddet guliid viidáset go fanas lea dievvan.
– Muhtin sajiin fertejit šárkkat čuožžut gáttis máŋga beaivve ovdal fas besset meara nala bivdit, dan sivas go eai beasa gurret fatnasiid. Dat ii leat dohkálaš!, Čállá mearrasámi guolleorganisašuvdna Bivdu reivves maid leat sádden Norgga njuoskaguollesearvái.
Sii čállet ahte jus unnit fatnasat eai beasa bivdit iežaset bivdomeari dan bale go guolli lea mearragáttis ja olámuttos, de sáhttá geavvat ahte šárkaguollebivdit masset iežaset váldodietnasa ja sáhttet oažžut stuora ekonomalaš váttisvuođaid.
Bivdu ávžžuha Norgga Njuoskaguollesearvvi guorahallat šárkaguollebivdiid bargodili, ja jus beaggin doallá deaivása, de fertejit jođánit gávdnat čovdosiid dasa, dieđiha Bivdu organisašuvnna jođiheaddji Inge Arne Eriksen reivves.
