-Almmuhus-
OĐĐASATBivdojoavkkut masse válaid maŋŋel dárkkisteami

Bivdojoavkkut masse válaid maŋŋel dárkkisteami

-

-

Guokte bivdojoavkku masse vála, man ledje ožžon Guovdageainnu suohkanis, go eai sáhttán čájehit beatnagiid go Finnmárkkuopmodat finai dárkkisteame beatnagiid.

Bivdojoavkkuin, mat bivdet Finnmárkkuopmodagas, galgá leat dohkkehuvvon guorranbeanaekvipáša (beana mas lea láidejeaddji) mii lea registrerejuvvon Norsk Kennel Klubba (NKK) guorranbeanaregistaris.

Finnmárkkuopmodat lea maŋemuš vahkkuid fitnan dárkkisteame beatnagiid mat eai šat leat registrerejuvvon NKK:s, ja beatnagat mat leat boarráset go 12 jagi sihkkojuvvojit automáhtalaččat beanaregisttaris.

 

Masse vála

Guokte bivdojoavkku, mat leat ožžon vála boahtte čavčča bivdináigodahkii, eai sáhttán čájehit beatnagiid go FeFo bođii guossái, čállá NRK Sápmi.

– Guokte bivdojoavkku eai sáhttán čájehit beatnagiid go áigguimet dárkkistit. Sis ii leat veterinearaduođaštus ge mii čájeha ahte beana lea jápmán maŋŋel ohcanáigemeari. Dan dihte masse sii válaid, mat dál fállojuvvojit earáide geat leat vuordinlisttus, muitala FeFo Meahcástanossodaga jođiheaddji Einar Johannes Asbjørnsen NRK Sápmái.

 

Bivdojoavkkut eai ráŋggáštuvvo eanet go ahte masset válaid.

– Bivdit, geat gullet bivdojoavkkuide, sáhttet eará bivdojoavkkuid fárus bivdit, nu ahte eai leat biehttaluvvon bivdimis, muitala Asbjørnsen.

-Almmuhus-