Porsáŋgguássit besset seamma bivdoeriin bivdit olles bivdoáigodaga.
Suoidnemánu 20. beaivvi ásahi Birasdirektoráhtta ođđa gaskkaboddosaš láhkanjuolggadusa Leavnnjajoga earrebivdui. Guokte beaivvi maŋŋel, suoidnemánu 22. beaivvi heaittihuvvui fas láhkanjuolggadus.
Dat mearkkaša ahte njuolggadusat maid FeFo almmuhii geassemánus leat fas gustovačča, dieđiha Finnmárkkuopmodat iežaset neahttasiidduin.
Porsáŋggu ássiin lea ain seamma bivdoearri ja besset bivdit guokte luosa mat leat badjel 65 sentte, ja oktiibuot njealje luosa. Sturrodatrádji mii ovdal lei 110 sente ii leat šat gustovaš.
Mánnodaga, suoidnemánu 25. beaivvi, lei Finnmárkkuopmodagas (FeFo) ja Lakselv grunneierforeningas (LGF) čoahkkin gos árvvoštalle joga dilalašvuođa dán rádjai geasis. Bivdoraporttat čájehit ahte bivdu lea dássážii mannan nu movt dábálaččat láve ja dan geažil bissot seamma bivdoearit olles bivdoáigodaga FeFo jogain.
