Boazodoalliid heahtegearggusvuođa bargojoavku bivdá dieđuid Guovdageainnu suohkanis.
Guovdageainnu suohkanstivra mearridii cuoŋománu 7. beaivvi juolludit 200 000 ruvnno heahtefondii, sidjiide geain lea siidaoassi ja geat dalle vásihedje guohtonroasu. Dát ruhta lei lassin dasa mii lei báhcán heahtefoanddas, mii ásahuvvui 2020:s. Oktiibuot lei suohkanis 553 504 ruvnno suohkana boazodoalliid heahtefoanddas. Doarjja sáhtii juolluduvvot gitta 50 000 ruvnno rádjái.
Eanandoallodirektoráhta lea bivdán Guovdageainnu suohkanis dieđuid mo ortnet lea doaibman, ja man ollu suohkan lea máksán doarjaga.
Norgga boazosápmelaččaid riikkasearvi, eanandoallo- ja biebmodepartemeanta ja stáhtahálddašeaddji leat dál geahčadeamen heahtegearggusvuođa boazodoalus, ja leat erenomážit jagi 2022 guohtonroasu geahčadeamen. Eanandoallodirektoráhta čállingoddi lea čakčamánu 15. beaivvi sádden e-poastta suohkanii gos bivdet suohkanis dieđuid.
