Árjja sámediggeáirras Hartvik Hansen bivdá dál bellodagaid searválaga ražastit sámi meahcásteddjiid doarjut ođđa mohtorjohtolatlága bokte.
Árja čállá preassadieđáhusas sii leat mearkkašan ahte Sámediggeráđđi ii leat prinsihpalaččat dorjon Molleš mohtorjohtolatášši mii lea gieđahallon Sis-Finnmárkku diggegottis gieskat.
Molleža duottarstobu olbmot áššehuvve diggegottis ođđajagimánus, muhto áššáskuhtti eiseválddit leat guoddalan duomu.
–Láhka berre rievdat
Árjja sámediggeáirras Hartvik Hansen lohká dán ášši čájehit čielgasit ahte dál ferte rievdadit mohtorjohtolatlága ja dasa gullevaš njuolggadusaid, vai dat buorebut válddášii vuhtii sámi meahcásteddjiid geat vižžet meahcis birgejumi.
– Dát livččii dehálaš sihke sidjiide geat alcceseaset vižžet borramuša ja sii geat maiddái vuvdet dan viidáseappot. Dát guoská maid báikkálaš, ekologalaš vásáhusturismii, oaivvilda Hartvik Hansen.
Doarespolitihkalaš hástalus
Hansen čállá ahte mohtorfievrruiguin galgá beassat vuodjit boares heasta- ja tráktormáđiid mielde go doaimmahit árbevirolaš meahcásteami, ja lea áibbas dárbbašlaš guolásteami, lubmema ja bivddu oktavuođas. Hansen lohká dál go leat ođasteame mohtorjohtolatlága, fertet álggahit doaimmaid mat nannejit meahcástanealáhusa.
– Álggahit ovttasbarggu bellodagaid gaskka mat geahčadit sámi beroštumiid, nannešii sin vuoigatvuođaid boahtteáigái, cealká Hansen.