-Almmuhus-
-Almmuhus-
-Almmuhus-
OĐĐASATBivdá Ráđđehusa jierpmálaččat bargat regiovdnaođastusproseassain

Bivdá Ráđđehusa jierpmálaččat bargat regiovdnaođastusproseassain

-

-

Sámediggepresideanta Aili Keskitalo ovddidii vuordámušaid gieldda- ja ođasmahttinministarii Monica Mælandii buktit buriid čovdosiid Finnmárkku ja Romssa fylkkasuohkaniid ovttastahttináššis.

– Mun vuorddán ahte ministtar ráhkkanaddá buriid ja dássásaš čovdosiid, ja lean muittuhan ministara ahte Sámediggi galgá konsulterejuvvot áššis, dadjá Keskitalo preassadieđáhusas.

 

Ii leat beassan buktit cealkámuša

Váilevaš čielggadeamit Romssa ja Finnmárkku fylkasuohkaniid ovttastahttima birra lea mielddisbuktán ahte fylkkat leat bázahallan proseassas ja Sámediggi ii leat beassan buktit cealkámuša das mot ovttastahttin sáhttá váikkuhit sámi beroštumiide.

– Stuoradikki ovttastahttinmearrádus ovdal Gardermoenšiehtadusa ii leat čielggaduvvon. Proseassa lea jođihuvvon dainna lágiin ahte Sámediggi ii leat beassan ovddidit iežas oaivila dan guovtti fylkka ovttastahttima birra ovdal go mearrádus dahkkui, dadjá vuorjašuvvan sámediggepresideanta.

 

Meannudit geassemánus

Sámediggi lea juo proseassa vuolde čalmmustahttán ahte almmolaš bargosajiid sirdin sámi guovlluide lea dehálaš sámi servodaga ovddideapmái.

Jus eambbo sentraliserejuvvo, de dat sáhttá láivudit sámegiela, sámi kultuvrra ja sámi guovlluid ealáhusovdáneami eavttuid, ballá Sámediggi.

Danne lea viidásit barggus dehálaš buorebut sajáiduhttit proseassaid ja čielgasabbot čuvget doaimmaid sirdima regionála dássái. Dasa guoská maiddái oažžut sadjái šiehtadusa mii lea vuoiggalaš sihke Romsii ja Finnmárkui.

– Dál lea lunddolaš digaštallat regionála dási doaimmaid. Sámediggi galgá meannudit ášši regiovdnaođastusa birra geassemánus. Mun lean evttohan čoahkkinastit gielda- ja ođasmahttinministariin Monica Mælandiin ovdal go dát ášši loktejuvvo Sámedikki dievasčoahkkimii, dadjá Keskitalo.

 

Áigeguovdilat

Earenoamážit leat golbma beali regiovdnaođastusas mat leat áigeguovdilat Sámediggái viidásit barggus.

Dat leat ođđa doaimmaid sirdin regiovnnaide main leat sámi beroštumit, seamma maiddái ođđa doaimmaid sirdin regiovnnaide main Sámedikkis lea dahje berre leat hálddašeapmi seamma guovllus sámi servodaga várás.

Viidásit mot Sámediggi sáhttá nannet ja konkretiseret iežas ovttasbarggu regionála eiseválddiiguin.

 

 

-Almmuhus-