NSR bivdá Sámedikki Davvi-álbmogiid guovddážii oččodit Áillohaš-musea, lanjaide gos ovdal lei vuojadanálddis.
Olmmáivákkis livččii vuojadanálddis mii ii leat šat anus. Dohko árvala Norgga Sámiid Riikkasearvi (NSR) ja Sámeálbmotbellodat ráhkadit Áillohaš-dáidagiidda bistevaš čájáhuslanja ja vuorkká. Bearjadaga evttohuvvui dát ášši ođđa áššin sámediggeráđđái.
Livččii fágabiras
NSR sámediggeáirras Sandra Márjá West ovddidii ášši dievasčoahkkimii.
– Davvi álbmogiid guovddážis Olmmáivákkis lea dálá áigásaš musea. Doppe livččii dál sámi girjerádjobálvalus, álbmotgirjerájus, dálááiggemusea Riddu Riđđu ja sámi giellaguovddáš ja lea danne nana fágamáhttu Áillohačča ektui, ja lagasvuohta daidda nannešii gaskkusteami, dadjá West.
Váddásiid duohken
Lásságámmis lea ovddasvástádus váldit vára Áillohačča árbbis, nugo viesus ja dáidagiin. Muhto dál ii gávdno latnja gos lea bistevaš čájáhus, ja vuđđudus lea maid ovddidan stuora dárbbu čájáhuslanjaide.
Sis lea vuorká Buvrovuonas Davvi-Tromssas, muhto dat leat váddásiid duohken go ferte álo olmmoš vuolgit dohko jus áigu luoikkahit dáidagiid.
Bååstedei ávkin
West čujuha maid ahte dát musealatnja livččii maid hui dehálaš Bååstede kulturmáhcahanprošeavtta čađaheapmái.
– Norgga álbmotmusea han eaktuda ahte gávdno albma vuorkásadji sámi museain jus galget máhcahit sámi dávviriid ruovttoluotta. Davvi-Romssas ii gávdno vuorkásadji. Danne livččii hui dehálaš oažžut dan vuorkká gos dáhkidivčččii dohkálaš temperatuvra, man goikkis vuorkkás galgá ja nu ain.
Sámediggeráđđi oaidná ahte livččii dehálaš Bååstede čađaheapmái oažžut dán vuorkká. Ja áigot bargat viidáseappot ášši ovddidit. Ruhtadeami gal ferte ohcat guovddáš eiseválddiin.
