-Almmuhus-
-Almmuhus-
OĐĐASAT– Bismmat bidjet standárda go mieđihit boasttu­vuođa

– Bismmat bidjet standárda go mieđihit boasttu­vuođa

-

-

Son rámida go bismmat mieđihit boastut dahkan homofillaid ja lesbbaid vuostá. 

Norgga bisma lea almmuhan cealkámuša mas mieđihit ahte Norgga girku lea dagahan bákčasiid ja vahágiid homofiillaid ja lesbbaid vuostá.

Dávvet Bruun-Solbakk mielas, gii earret eará lea leamaš mielde lágideame Sápmi Pride Guovdageainnus, lea buorre go čielgasit mieđihit ahte Norgga girku lea boastut láhtten go vuosttaldedje 50 jagi áigi, go dohkkehedje ahte homofiillain galgá seamma árvu go earáin.

– Mun gáttán hui buorren ja dehálažžan go sii leat guorahallan ja fuobmán ahte sii leat leamaš oassin das go homofiillat eai lea dovdan oassin girkus. Cealkámušain dovddastit sii oasi das mii leat dagahan ahte homofiillain ja earáin leat šaddan unohas vásáhusat, dadjá Bruun-Solbakk.

Dehálaš servodagas

Dan jáhkká son earenoamáš dehálažžan go boahtá girkus, mii lea nu guovddáš sámi servodagas.

– Mearkkaša ollu go váldet ovddasvástádusa ja almmolaččat mieđihit dan. Mun smiehtan ahte lea dehálaš mieđihit go leat dahkan boastut. Earenoamážit go leat nu garra jienat mat buktet vaššicealkámušaid queer-servodaga vuostá. Bismmat bidjet standárda, ja čájehit ahte dat ii heive ahte nu go dakkár TikTok-sárdneolbmát dahje báhpat čájehit oaiviliid main lea garra vašši homofiillaid vuostá, čilge Bruun-Solbakk.

Ii positiivva dohkkeheapmi homofiillaide 

Cealkámuš boahtá dan oktavuođas go Lea 50 jagi áigi go ráŋggáštuslága 213. paragráfa, mii earret eará dagai lobiheapmin čađahit sexa dievdoolbmuid gaskka, heaittihuvvui. 50 jagi áigi galge dohkkehit homofiillaid ja atnit sin seamma árvvus go earáid, muhto Bismačoahkkimis aŋkke konkluderejedje ahte ii leat mihkke Biibbalis gokko čujuhuvvo positiivvalaš dohkkeheapmi homofiilabárain seamma ládje go nissoniid ja dievdduid gaskka. Bismmat celket dál ahte dagahii noađi homofiillaide go dovde sin eallima gáržžiduvvon teologalaš áššiin. Dál áigot ge duođaštit buohkaid ovttaskas olmmošárvvu, ja dovddastit ahte girku ii leat vuhtii váldán homofiillaid eallindili.

Eanet konkrehta

Bruun-Solbakk lohká váillahit veaháš konkrehta čuovvoleami boahtteáigái.

– Sávan sii ráhkadit plána movt duosttaše viidáset. Gávdnojit olbmot geat geahččalit signaliseret ahte bohtet rievdadusat, ja munnje buktá maid cealkámuša vuordámušaid ahte bohtet čielga rievdadusat, dadjá Bruun-Solbakk.

Son aŋkke maid oaidná girku stuora ásahussan, iige jáhke dan geavvat beaivvis nubbái.

– Stuora ásahusaid rievdadusat váldet áiggi, muhto mun illudan čuovvut makkár konkrehta rievdadusaid cealkámuš buktá.

-Almmuhus-