Davvi-Hålogalándda bismmalávdegodderáđđi lea morrašis go lea soahti dál Eurohpás.
– Min kránnjáriika, Ruošša, lea fallehan Ukraina ja dál leat logemat duháha báhtaran Ukrainas. TV:s oaidnit govaid ahte visttit leat buollimin, mat leat deaivvahallan Ruošša rakeahtaide, ja lea dieđihuvvon ollu olbmot duššan, čállá Davvi-Hålogalándda bismalávdegoddi preassadieđáhusas.
Atnit fuola ja čájehit liekkusvuođa
Bismalávdegottis lea máŋga jagi leamaš buorre ja lagaš ovttasbargu Ruoššain. Máŋga ruošša orrot guovllus ja maiddái ukrainalačča.
– Sii leat buohkat sivaheamit soahtedaguin mat gevvet, ja mii dáhttut álbmoga dáppe davvin atnit fuola ja čájehit liekkusvuođa sihke ruoššaide ja ukrainalaččaide, dieđiha bismmaráđđi.
Bissehit dakkaviđe
Davvi-Hålogalándda bismalávdegoddi garrasit moaitá Ukraina soađi, ja dáhttot soahtedaguid bissehuvvot dakkaviđe.
– Mii appelleret ahte máilmmi jođiheaddjit čájehit jierbmáivuođa ja váldet ovddavástádusa, ja ovttas máŋgga riikka kristtalaš girkuin ja girkojođiheddjiiguin rohkohallat mii Ipmeláhččái ahte doalašii gieđas máilmmi badjel dán lossa áiggis, čállá bismaráđđi.
