-Almmuhus-
OĐĐASATBisánanbáiki moallun báhcán

Bisánanbáiki moallun báhcán

-

-

Joint Viking militearahárjehallan lea guođđán ovtta bisánansaji dego livčče soahti leamaš das.

Gobba-Suolojárgátti bisánanbáikkis, guhtta kilomehter davábeale Máze, lávejit dábálaččat leat golbma beavddi oktan stuoluiguin. Das lávejit olbmot sáhttit bisánastit ja boradit. Dál dattege dan ii leat vejolaš go beavddit leat oalát mollejuvvon. Báikkis vuhttojit bealtavovnnat vuodján ja moallanan beavddit leat bođusin Joint Viking militearahárjehallamis, mannan vahkkus duođaštii Suodjalusa HV17 hoavda Ståle Grytli, dáhpáhusa Altapostenii.

 

Buorre ovttasbargu

Joint Viking militearahárjehallan čađahuvvui njukčamánus miehtá Finnmárkku, dás oassálaste badjel 5000 soalddáha sihke eatnan alde, áimmus ja meara alde. Dán oktavuođas leat bealtavovnnat mollen bevddiid Gobba-Suolojárgáttis.

Stáhta Geaidnodoaimmahaga gulahallanráđđeaddi Thomas Rolland muitala iežaset gulahallan Suodjalusain dán birra.

 – Mis lea buorre ovttasbargus singuin dákkár vahágiid oktavuođas. Suodjalus máksá buot goluid ja mii hahkat ođđa bevddiid ja stuoluid diehko, dadjá Rolland Ávvirii.

 


VISOT MOLLEN: Dán beavddis lea illá mearka ge báhccán. Dál lea Stáhta Geaidnodoaimmahat bargamin áššiin ja doivot ođđa bevddiid hahkat ovdal geasi.
Govven: Kari Lisbeth Hermansen.

Geassái gárvvis

Rolland muitala iežaset bargamin áššiin.

 – Muhto eat dieđe guhká ádjánat ovdal go visot lea čorgejuvvon ja gárvvis. Dat lea veahá gitta diŋgonáiggis ja nu ain. Ovdal geasi goittot doaivut leat geargan, muitala Rolland.

 

Ávvir ii fáhten HV17 hoavdda Ståle Grytli Ságaide dán áššis.

 

 

 

 

 

 

-Almmuhus-