Márkomennui, cikcu buollašis duoddaris davvin, boahtá revolušuvnnalaš joavku Biru Baby iežas imašlaš stiillain ja soundain. Festiválabuvttadeaddji Susanne Amalie Langstrand-Andersen oaivvilda dá lea livekonsearta man ii okta ge galgga manahit.
Márkomennui, cikcu buollašis duoddaris davvin, boahtá revolušuvnnalaš joavku Biru Baby iežas imašlaš stiillain ja soundain. Festiválabuvttadeaddji Susanne Amalie Langstrand-Andersen oaivvilda dá lea livekonsearta man ii okta ge galgga manahit.
– Lea booking mainna mii leat hui duhtavaččat! Biru Baby lea oalle ođđa urbi sámi artistamáilmmis, ja sin fárus boahtá maiddái áibbas ođđa šáŋŋer. Go sii lávkejit lávdái, de eai leat vuolgán soabadallat, ja máŋgga láhkái de ovddastit sii ođđa feministalihkadusa man vuohttit Sámis, muitala festiválabuvttadeaddji Susanne Amalie Langstrand-Andersen preassadieđáhusas.
Mielahis konsearttat
Joavku seaguha dološ sámi luođi ođđaáiggi sivilisašuvnna next level musihkain. Boađus gohčoduvvo «jáhkkemeahttumin», «briljánta áidnalunddogin» ja «Babymetal sivran». Biru Baby váldolahtut leaba sámenieiddaguovttis Iki ja Hánná, ja gaskkohagaid leat artisttat nu go Hell-G ja KT (In Da House) joavkku lassin mielde konsearttain.
– Biru Baby lea doallan muhttin mielahis konsearttaid 2016:s, ja musihkkabirrasis leat sii šaddan dábálaš ságastallanfáddán. Lea duohta illu beassat ovdanbuktit sin Márkomeanu gussiide, dadjá Langstrand-Andersen.
Imašlaš Biru Baby
Musihkkasuorgefestiválas Trondheim Callingas nammaduvvui Biru Baby eanemus imašlaš oassin prográmmas, ja iešguđetge musihkkamagasiinnat ja musihkkajournalisttat atne sin festivála «vuoitin». Nappo lea láhččojuvvon erenoamáš vásáhussii konseartalávddis Evenáššis.
Márkomeannu álggahuvvo duorastaga suoidnemánu 27. beaivvi, ja olles vahkkoloahpa besset guossit vásihit sámi artisttaid, dáiddáriid ja kulturovdanbuktimiid miehtá Sámis. Prográmmas lea musihka, visuála dáidaga, lávdedáidaga, girjjálašvuođa, semináraid, valáštallamiid, vádjolusaid, sámi márkana, ja vel sierra mánáid- ja nuoraidprográmma.
