Kolombialaš filbma Birds of Passage rahpá Directors’ Fortnight dáhpáhusa Cannesis maid norgalaš buvttadanfitnodat Mer Film lea veahkkebuvttadan.
Kolombialaš filbma Birds of Passage rahpá Directors’ Fortnight dáhpáhusa Cannesis maid norgalaš buvttadanfitnodat Mer Film lea veahkkebuvttadan.
Filmma lea bagadallan Cristina Gallego ja Ciro Guerra, geat leat ráhkadan jagis 2015 Oscar-nominerejuvvon filmma Embrace of the Serpent.
Filmma lea veahkkebuvttadan norgalaš buvttadanfitnodat Mer Film ja filbma lea ožžon ruđalaš doarjaga Riddu Riđđu festiválas ja Internašunála Sámi Filbmainstituhtas, dieđiha Internašunála Sámi Filbmainstituhtta preassadieđáhusas.
Wayuu-bearraša birra
Gallego ja Guerra ođđa filbma lea vuođđomuitalus Kolombia narkotihkavuovdimis. Birds of Passage čuovvu Wayuu-bearraša, mii seaguhuvvo marihuána vuovdimii amerihkálaš nuoraide 1970-logus.
Narkotihkavuovdin álgá fáhkka mannat endorii ja vuovdnáivuohta, áŋggaštus ja čeavláivuohta dagahit soađi bearrašis.
Wayuu-álbmot lea stuorámus álgoálbmotjoavku Kolombias, gos filbma maiddái čájehuvvo.
Dorjot internašunála álgoálbmogiid filmmaid
Directors’ Fortnight lea oassin Cannes-filbmafestivála siidoprográmma, man ulbmilin lea ovdanbuktit ođđa ja vitmes bagadalliid čehppodaga. Directors’ Fortnight lágiduvvo 50. geardde Cannesis miessemánu 9. gitta 19. beivviid 2018.
Internašunála Sámi Filbmainstituhtta lea dorjon sámefilmmaid ovdáneami ja buvttadeami jo jagis 2007:s, muhto maŋimus jagiid áigge ISFI lea viiddidan doaimmaideaset maiddái internašunála álgoálbmogiid filmmaid doarjumii ja eamiálbmot filbmabargiid ovttasbarggu ovddideapmái.
Njukčamánus Guovdageainnus ISFI lágidii Álgoálbmogiid filbmakonferánsa ja ásahii Árktalaš álgoálbmot filbmafoandda AIFF, mas leat ovttasbarggus Ruonáeatnan, Alaska, Kanada ja Ruošša. AIFF ruovttusiiddut leat almmuhuvvon dán vahkkus čujuhusas www.aiff.no.
