-Almmuhus-
-Almmuhus-
-Almmuhus-
OĐĐASATBirassearvvit vuoittáhalle dikkis

Birassearvvit vuoittáhalle dikkis

-

-

Greenpeace, Luondu ja Nuorat, ja Besteforeldrenes klimaaksjon organisašuvnnat vuoittáhalle stáhtii dikkis, Barentsábi oljobohkanáššis. Dál fertejit máksit áššegoluid.

Searvvit fertejit máksit 580 000 ruvnno Oljo- ja energiijadepartementii, čuožžu duomus man Oslo diggegoddi celkkii duorastaga.

Birassearvvit manne diggái áššiin go oaivvildedje ahte stáhta rihkku Vuođđolága 112 paragráfa, go leat suovvan oljju bohkat Barentsábis.

Nu gohčoduvvon birasparagráfa deattuha ahte buohkain lea riekti eallit birrasis mii sihkkarastá dearvvašvuođa, ja ahte riggodagat galget hálddašuvvot vai boahttevaš buolvvaid rievttit maid váldojit váras. Dat geatnegahttá maid stáhta čađahit doaimmaid mat sohpet dáinna mearrádusain.

Oslo diggegoddi hilgu organisašuvnnaid gáibádusa. Sii leat gáibidan fámohuhttit bohkanlobi. Diggegoddi cealká ahte stáhta lea álggahan doaimmaid nu go lágas gáibida.

Duomus celko maid ahte birasparagráfa ii fátmmas nuoskkideami mii dáhpáhuvvá eará riikkain, dan oljju dihtii maid Norga eksportere olgoriikii. Diggegoddi deattuha maid ahte ii leat hirbmat stuora birasvahát mii sáhttá čuožžilit oljobohkama dihtii.

 

– Ii čielggaduvvon

Alimusriekti lea cealkán ahte prinsihpalaš duomuin sáhttet buorit ákkat beassat áššegoluin.

– Diggegotti duomus ii leat dat čielggaduvvon, dat čielggaduvvo easka jus Alimusriekti meannuda ášši, čállá diggegoddeduopmár Hugo Abelseth.

Organisašuvnnat galget guovtti vahkkus máksán áššegoluid. Sii leat dieđihan ahte leat juo dássážii golahan eambbo go guokte miljovnna ruvnno dán áššái.

 

– Áigot sirdit fámu

Birasorganisašuvnnat oaivvildit ahte stáhta ii rihko dušše vuođđolága, muhto maiddái Norgga birasgeatnegasvuođaid Parisšiehtadusa bokte.

Dasa lassin go Norgga CO2-luoitin lassána, de oaivvildit organisašuvnnat ahte stáhta ii dine oljobohkamis.

Ráđđehusadvokáhtta Fredrik Sejersted lea biehttalan buot čuoččuhusaid, ja čuoččuha ahte organisašuvnnat áigot sirdit fámu Stuoradikkis riektevuogádahkii.

– Lea ođas ahte diggevisti adno arenan politihkalaš kampánjjas. Dat lea amas Norgga riektevugiide, logai Sejerstad NTB:i go ášši manai diggái.

-Almmuhus-