Finnmárkkus lea birasrihkolašvuohta lássanan maŋemuš jagi.
Vuossárgga almmuhii Finnmárkku politiijaguovllu raportta mas bohtet ovdan jagi 2017 logut.
Birasrihkolašvuohta lea lassánan, ja diibmá lei ođđa olahus.
Diibmá dieđihuvvojedje golbma eambbo ášši go 2016:s. Oktiibuot 265 ášši leat politiijat dutkan, ja 46 proseantta áššiin gullet mohtorjohtolahkii.
Boazoealáhusas ii leamašan makkárge birasrihkolašvuohta.
Narkorihkolašvuohta unnu
Narkorihkolašvuohta lea mealgat unnon, oktiibuot 440 ášši dieđihuvvojedje politiijaide diibmá.
2016:s ledje 731 ášši. Roavva narkoáššit dollet sullii seamma dási go 2016:s, ja leat mealgat unnit áššit 2015 rájes.
Diibmá ledje unnit go vihtta roavva ášši dieđihuvvon politiijaide.
Oktiibuot njealjis dubmehalle rihkkon narkolága, okta dubmehalai 10 jagi giddagassii ja duoguštedje 3,5 miljovnna ruvnno ja Mercedes ML biilla, boahtá ovdan politiijaid raporttas man Finnmárkku politiijameašttir Ellen Katrine Hætta almmuhii mannan vahkus.
