-Almmuhus-
SMÁVVAOĐĐASATBiras­direktoráhta ráva mo sirret ruošša­luosa stuorra čázá­dagain

Biras­direktoráhta ráva mo sirret ruošša­luosa stuorra čázá­dagain

-

-

Lea go vejolaš bivdit buot guliid mat gorgŋejit deanuide ja sirret eret muhtin guollešlája? Birasdirektoráhtta muitala ahte áššedovdit árvvoštallet iešguđetlágan bivdovugiid 2022:s. 

Nationála doaibmaplánas eastadit ruoššaluosa leavvama, rávvejit ásahit merddiid bivdit buot guliid eallin, mat gorgŋejit jogaide. Ulbmil lea sirret eret ruoššaluosa ja luoitit eará guliid dearvan meattá. Merddiid galgá caggat rastá joga nu lahka oivoša go vejolaš.

Ovdánahttet ja isket merddiid deanuin

Lea čázádaga sturrodat mii mearrida guđe bivdovuogi geavaha. 

– Mii leat ain ohcamin buori čovdosiid deanuide nu go Detnui, Áltái ja Romssa deanuide, lohká Birasdirektoráhta direktevra Ellen Hambro preassadieđáhusas. 

Birasdirektoráhtta geavaha dál ovddeš guollecaggi vásáhusaid mat leat geavahuvvon Driva jogas ja Telemárkku čázádagas. Dasa ásahuvvui jagi 2017 doaresfágalaš áššedovdijoavku. Das lea máhttu guollebiologiijas ja čázádatteknihkas ovdánahttit iešguđet guollecakkiid stuorát jogaide. 

– Dainna guollebivdovugiin galget buot čázádaga lunddolaš guolit beassat dearvan meattá. Mii doaivut mii gávdnat buriid čovdosiid 2022:s, nu ahte mii sáhttit eastadit ruoššaluosa gorgŋet čázádagaide 2023 geasi, lohká birasdirektevra.

Smávimus čázádagain doibmet hálbbes mearddit bures. Gaskamearálaš stuorra jogain lea buoret geavahit merddiid main lea stálleridda dahje mas lea govduridda. Dan lea Birasdirektoráhta ruoššaluosa eastadangealbojoavku deattuhan. Dat bargu lea čađahuvvon ovttas báikkálaš guolástanvuoigatvuođalaččaiguin ja doaimmat leat heivehuvvon báikkálaš diliide ja vejolašvuođaide.

Diehtu

Ruoššaluossa (latiinnagillii: Oncorhynchus gorbuscha , dárogillii: pukkellaks) lea amas guollešládja Norggas. Dat áitá Norgga eamiguollenáliid ja eará luonddumáŋggabealatvuođa. Mielahis olu jápmán ruoššaluossa váikkuha čázádagaid čáhcekvalitehtii. 2015 rájes lea mielahis olu ruoššaluossa leavvan jogaide gođđat, veajehat luitet merrii vuosttaš jagi ja gorgŋejit fas johkii jagi maŋŋá. 2021:s goddojedje badjel 100 000 ruoššaluosa jogain. Ruoššaluossa gullá Jaskesáhpái ja lea leavvan Norgii go Ruošša lea gilván dan luossašlája Oarjjabeale Ruošša jogaide. 

-Almmuhus-