Mánáidprográmmaráidu Binnabánnaš dubbejuvvo anáraš- ja nuortalašgillii. Ráidu almmuhuvvo golggotmánu álggus Yle Areenas, Mánáid Areenas.
Dán rádjai Binnabánnaš lea hupman dušše davvisámegiela.
Yle Sámi mánáid-tv Unna Junna deavdá 10 jagi ja mearkajagi gudnin šaddet anáraš- ja nuortalašgielat Binnabánnaš prográmmat fargga oaidninládje Yle Areenas.
– Mii leat vuosttaš geardde dubben, dahkan dakkár osiid, mat leat dubbejuvvon ja dál álggos dán čavčča dat bohtet internehttii, dohko Mánáid Areenai ja dasto boahtteáiggis dat sáddejuvvojit maiddai tv:s dát anáraš- ja nuortalašgielat oasit maiddái, muitala Unna Junna mánáidprográmma buvttadeaddji Ritva Torikka Yle Sápmái.
Sámegielat mánáid fálaldat čohkkejuvvo Yle Areenas ovtta sadjái
Unna Junna hupmá davvisámegillii lassin maid anáraš- ja nuortalašgiela.
Unna Junná doaimmahus lea dubben ja hupman buot golmma sámegillii dán prográmma osiid.
Prográmma oasit ihtet golggotmánu álggus oaidnin láhkai Yle Areenai, Mánáid Areenai. Dan rájes Yle Areenas sáhttá gávdnat ovtta sajis buot sámegielat fálaldagaid mánáide.
