-Almmuhus-
VALÁŠTALLANBinges-gilvvu máđija ii dan dihte rievdda

Binges-gilvvu máđija ii dan dihte rievdda

-

-

Binges-gilvvuid lágideaddjit ledje plánen ahte galgá ođđa loahppa gilvvuin, muhto ollu arvvi geažil leat jeaggeeatnamat šaddan beare čáhccát, ja nu doalahit ovddit jagiid láhtu.

Lávvordaga borgemánu 20. beaivvi lea 5. geardde go Bingesrittet meahccesihkkelgilvu lágiduvvo boaresluoddaráigge Mieronis Mázii.

 

Vuordit boahtte jahkái

Lágideaddjit ledje plánen ahte galgá ođđa loahppa gilvvuin, muhto nu ii šatta.

– Dán jagi leimmet illudan oažžut ođđa loahpa gilvoluddii, muhto go maŋemus vahkuid lea arván nu hirbmadit, de lea dulvan nu olu ahte eat sáhte bidjat gilvoluotta jeaggeeatnama badjel, nu go lei jurdda. Danne fertet vuordit boahtte jahkái ovdal váldit adnui FeFo-bálgá, ja atnit dan seamma luotta vulos Stuoroaivvis go ovddit jagiid, muitala Gilvojođiheaddji Marit Helene Eira.

 

140 oasseváldi dieđihan

Eira muitala moadde beaivi ovdal go dieđiheapmi gidde, leat givlui badjelaš 140 oasseváldi dieđihan gilvui.

– Dát leat sullii seamma olu go maid diibmá ledje dán áigge. Mii sávvat ahte bohtet vel eanet ovdagihtii dieđiheamit ovdal go giddet dieđiheami neahtas duorastaga borgemánu 18. beaivvi.

 

Nuoraide maid eará luotta

– Min ođđa nuoraidgilvu SeastinBáŋkku1 Miila galggai nai mannat FeFo-bálgá mielde, nu ahte mii fertet eará gilvoluotta ráhkadit dasa maiddái, lohká Eira.

 

Nuoraidgilvu ja mánáidgilvu SeastinBáŋkku1 Mánát álgá Mázes dii 11.30, ja dasa lea nuvttá dieđiheapmi ovdal gilvvu. Nuorat geat leat 13 jagi ja boarrásat fertejit máksán liseanssa ovdal gilvvu.

 

 

 

-Almmuhus-