Sámedikki ráđđelahttu reagere go guovddáš SNO-bargit čájehit nu čielgasit ahte dorjot boraspiriid seammás go galget leat mielde hálddašeame dan. – Bilidit iežaset luohtehahttivuođa boazoealáhusa dáfus, lohká son.
Sámedikki ráđđelahttu reagere go guovddáš SNO-bargit čájehit nu čielgasit ahte dorjot boraspiriid seammás go galget leat mielde hálddašeame dan. – Bilidit iežaset luohtehahttivuođa boazoealáhusa dáfus, lohká son.
Ikte čálii Ávvir go Stáhta Luonddubearráigeahču bargi, Ken Gøran Uglebakken, lea loddegáhttensearvvi Norgga Ornitologalaš searvvi (NOS) miellahttu.
NOS váldoulbmil lea gáhttet lottiid, ja erenoamážit gazzalottiid, nu go goaskimiid.
Sis lea juste dál kampánnja jođus, mas ávžžuhit garrasit ahte ii galgga goaskimiid báhčit, ja maid čuoččuhit ahte olu bohccot leat nu váibbahat mii dagaha ahte goaskin álkibut falleha daid, dahje leat juo jápmán, ja go goaskin daid borrá, de oažžu siva ahte lea goddán maid dan.
Čanastat
Čájehuvvo ahte seamma olmmoš registrere goaskinbesiid ja iská leat go čivgan dihto besiide, seammás go lea mielde searvvis man ulbmil lea gáhttet goaskimiid. Son galgá maid duođaštit ráppiid maid goaskin sáhttá leat goddán.
Duođašteamit mat sáhttet dagahit ahte boazodoalli oažžu báhčinlobi goaskimii.
Jurddašit bealálašvuođa
Sámedikki ráđđelahttu Mariann Wollman Magga, geas lea ráđi boazodoalloovddasvástádus, ii suorgan dainna dieđuin ahte Uglebakken lea goaskinsearvvi miellahttu.
– Olu diekkár berošteaddjit leat maid dávjá váldán oahpu juste dan suorggis mas beroštit, dainna in suorgan. Dat mii baicca mii lea imaš, lea go eai oainne ieža dan ahte dat čanastat sáhttá dagahit ahte bilidit iežaset luohtehahttivuođa boazodoalus. Nu dat orru ge leamen dál juo dahkan, lohká Wollman Magga.
Ovttasbargu
Wollman Magga lohká ahte dieđihit ráppiid, čohkket daid ja doalvut dárkkisteapmái SNO-bargiid lusa, lea ovttasbargu man boazosápmelaš ja SNO dahket.
Son lohká ahte juste dat ovttasbargu galggašii doaibmat vai boazodoallit bidjet návccaid oažžut duođaštuvvot nu olu go vejolaš ráppiid mat leat goddojuvvon ráfáiduvvon boraspiriide, go daid ovddas han galgá oažžut máksot, ja maid galget veahkehit boraspirehálddašeamis.
– Diet ovttasbargu han galggašii ain doaibmat boahtteáiggis maid. Jus SNO massá luohtehahttivuođa, dalle han ii doaimma hálddašeapmi nu go galggašii, lohká son.
Eahpidit boazodoalli luohtehahttivuođa
Wollman Magga lohká ahte go nu dávjá eahpidit boazosápmelačča luohtehahttivuođa, ahte dávjá eai jáhke go sii muitalit maid meahcis oidnet, ja ahte go buktet ráppi ahte dan lea boraspire goddán, de leat ieža mielde dakkár servviin maid ulbmil lea gáhttet daid seamma elliid mat vaháguhttet boazodolliid.
– Nu ii sáhte leat, ja lea buorre go váldojit dákkár áššiid almmolašvuhtii, lohká son.
Eambbo bargit
Ávvir lea cavgileami vuođul iskan eambbo čanastagaid SNO ja NOS gaskkas. Čájehuvvo ahte doppe leat eambbo čanastagat.
Muhtin SNO-bargi Leavnnjas, Torkjell Morset, lea Finnmárkku NOS luohttámušolmmoš. Son lea Finnmárkku NOS ossodaga stivralahttu.
– Go muhtin guhte bargá ges SNO Leavnnja ossodagas, lea Finnmárkku NOS stivralahttu, movt dat orru leamen du mielas?
– Nu go lohken eske, in suorgan dainna, ja jáhkán doppe leat eambbogat geat leat seamma dilis. Dat masa reageren lea go eai jurddaš iežaset bealálašvuođa birra. Mii Sámediggeráđis šaddat dávjá lonohallat bargguid go lea sáhka bealálašvuođa birra vissis áššis. Dan mun ohcalan dáid gaskkas maid, lohká son vel loahpas.
