-Almmuhus-
OĐĐASATBiila­rieggát jorralit eret vuoje­dettiin

Biila­rieggát jorralit eret vuoje­dettiin

-

-

Jahkásaččat dieđihuvvo dáhkádusfitnodahkii Ifii ahte njeallje-vihtta biilla leat hirbmadit reakčanan, go biilarieggát leat luovvanan vuojedettiin johtolagas. 

Dáhkádusfitnodat If muittuha olbmuid čavget juvlamuhtteriid fas go lea vuodján 10-12 km, maŋŋá go lea molson biilarieggáid. Dat gusto maid jus leat molssuhan biilarieggáid biiladivohagas dahje biilarieggávuorkkás. 

– Lea dušše lihkku ahte olbmot eai leat duođalaččat roasmmehuvvan. Jus biila fáhkka massá biilajuvlla go lea vuodjimin 80-90 km tiimmus, de ádde juohkehaš mo geavvá, lohká If diehtojuohkinhoavda Sigmund Clementz preassadieđáhusas.

Son muitala ahte lea eanet biilavuoddjit geat vásihit dan, go dat mii dieđihuvvo dáhkádusfitnodahkii, 

– Lihkus fuomášit ahte juoidá lea boastut ovdal go lihkohisvuohta geavvá. Dábálamos vuohki luovos juvlamuhtteriid fuomášit, lea ahte gullá ártegis jiena vuojedettiin. Muhtimin dovdá maid ahte biila heailu duon dán guvlui ja ahte gullá «juoidá» go botnjá biilastivrrana, čilge diehtojuohkinhoavda. 

Clementz lohká leat dehálažžan ahte juohkehaččas lea juvlaruossa biillas, vai sáhttá čavget muhtteriid. 

-Almmuhus-