Ii okta ge roasmmohuvvan go biila ja táŋkabiila beaškkeheigga oktii.
Kárášjoga márkanguovddáža olggobealde deaividii biilalihkohisvuohta odne.
– Muhtin biila ja táŋkabiila beaškkeheigga oktii. Biila galgá vuodján táŋkabiilla ja jori gaskii, čilge Nuorta-Finnmárkku politiijaguovllu operašuvdnajođiheaddji Lars Rune Hagen.
Ii okta ge roasmmohuvvan
Lihkohisvuohta dáhpáhuvai láhka Rávdojoga, guokte kilomehtera márkanis Guovdageainnu guvlui.
– Biillas ledje guokte olbmo, muhto ii goabbá ge roasmmohuvvan lihkohisvuođas. Sihke politiijat ja ambulánsa manne lihkohisvuođa báikái, dadjá Hagen.
Eai dieđe siva
Biila roakčanii sakka go beaškkehii oktii táŋkabiillain, muhto lihkohisvuođa báiki galgá leat čorgejuvvon.
– Mun in dieđe manin lihkohisvuohta deaividii, in ge sáhte dadjat maidege dan birra go leat earát geat dutket ášši, lohká Hagen.
