Go arvá Seattle gávpogis USA:s, de jápmet luosat jogain ja ádjagiin birra gávpoga. Dutkit leat máŋgalot jagi ohcan siva dasa. Dál leat dutkit fuomášan ahte lea dábálaš ávnnas biilajuvlarieggás mii lea sivalaš luossajápmui.
Álo go olu lei arván Seattle gávpogis, de jápme silbaluosat. Dutkit dihte ahte lei juoidá mii bođii geainnuid bokte. Dál leat University of Washingtona dutkit fuomášan ahte lea 6PPD ávnnas mii gávdno eanaš biilajuvlarieggáin, skuovain ja mašiinnain mii lea sivalaš. 6PPD kemikála eastada gumme luoddaneamis ja lea váralaš sihke olbmuide ja elliide. Go 6PPD guoská ozonii mii lea áimmus, de rivdet dan molekylat nu ahte dat goddá silbaluosa, čállá vetenskap.svt.se. – Luossa lea oalle gievrras guolli mii ii jáme nu álkit, muhto 6PPD kemikála goddá luosa moatti tiimmus, čilge University of Washingtona biraskemikála professor Zhenyu Tian gii lea gávdnan dan eará jogain USA:s.
Ruoŧas leat maid gávdnan olu jápmán luosaid miehtá riikka, maiddái biilajuvlarieggá bázahusaid čázádagain.
– In jáhke 6PPD lea sivalaš dasa ahte min luosat jápmet, muhto ii leat buorre ahte mii luoitit kemikálaid lundui, lohká biraskemiija professor Lennart Balk. Biologiija professor Joachim Struve čilge dál ráddjejit njuolggadusat maid lea lohpi bidjat dávvirii, muhto ii gávdno njuolggadus mii čájeha makkár kemikálaid dávvir luoitá lundui.
