-Almmuhus-
SMÁVVAOĐĐASATBiila­johtolat lassánán 2021:s

Biila­johtolat lassánán 2021:s

-

-

Vaikko ođđajagemánus ja guovvamánus 2021 lei uhccit johtolat go dábálaččat láve, de lassánii eanet jagi mielde gitta njealje prosentii.

– Koronapandemiija lei ain hui guovddážis diibmá, maiddái johtolaga ektui. Jagi 2021 leamaš iešguđetlágan ráddjehusat ja ávžžuhusat mat leat váikkuhan álbmoga mátkkoštandábiide.  Miehtá jagi lea olbmot ávžžuhuvvon bargat ruovttukantuvrras, garvit kollektiivasáhtuid johtima ja ráddjet sosiála doaimmaid ja dat lea váikkuhan olbmuid mátkkoštandábiide, lohká Stáhta geaidnodoaimmahaga direktevra Per Morten Lund.

Koronadávdda váikkuhusat johtolahkii

Stáhta geaidnodoaimmahaga logut čájehit ahte jagi 2021 guokte vuosttaš mánu geahppánii johtolat 11-15 proseanttain go covid-19 nu gohčoduvvon Deltavariánta leavvagođii. Dat dilli váikkuhii maid olbmuid dálveluomustallamii ja beassášlupmui. Geassemánuin lassánii johtolat ja norgalaččat vuodjigohte eambbo, erenoamážit go Eurohpá riikkat rahpagohte rájáid suoidnemánus. Garra ja einnoskeahtes sisabeassannjuolggadusat Norgii beassat dagahii ahte ledje hui unnán olgoriikka turisttat Davvi-Norggas, Romssa ja Finnmárkku fylkkas lassánii johtolat dušše njeljiin proseanttain.

Easka čavčča beallái, go ráđđehus válddii eret eanaš ráddjehusaid, de lassánii biilajohtolat measta dábálaš dássái. Skábmamánus lassánii biilajohtolat 13 proseanttain, jáhkkimis go eanaš olbmot ledje boahkuhuvvon ja garra mátkkoštangáržžideamit 2020:s ledje ložžejuvvon.

– Pandemiija, mii farga lea bistán guokte jagi, lea váikkuhan servodaga mátkkošteapmái ja johtolahkii. Biilageavaheapmi lea lasssánan go olbmot leat garván kollektiivajohtolaga, lohká Lund.

-Almmuhus-