Mánnodaga beaškkehii skuter biillain oktii luotta alde mii manná Kárášjogas Supmii. Skutervuoddji lea veahá roasmmehuvvan.
Lihkohisvuohta dáhpáhuvai doppe gos skuterláhttu rasttida Suomaluotta, sullii 2 kilomehtera olggobealde Kárášjoga márkanbáikki.
Skuter lea sakka billahuvvan.
– Skutervuoddji biegui bákčasiid niskkis ja olggiin. Son lea sáddejuvvon Kárášjoga dearvvašvuođaguovddážii, ja ambulánsa lea leamaš lihkohisvuođabáikkis, muitala Gunnar Øvergaard, Finnmárkku politiijaid preassaoktavuođas.
– Ii doallan bisánangeatnegasvuođa
Kárášjoga politiijakantuvrra bealis muitalit sii leat dutkamin ášši.
– Min dieđuid mielde dán rádjái ii leat skutervuoddji geahčestan márkanguvlui ovdal go rasttildii luotta. Son lei boahtimin váris ja mannamin joga guvlui, dadjá Kjell Magne Grønnli, gii jođihii politiijaid barggu lihkohisvuođabáikkis.
Báikkis lea gálja
Báikkis gos lihkohisvuohta dáhpáhuvai lea hui gaálja go lea jiekŋa luotta alde, sáhttá Grønnli duođaštit.
Sin dieđuid mielde de oinnii biilavuoddji skutera geaidnoravddas, nu ahte biilavuoddji ložžii leavttu vai lea gearggus goazastit jus skuter boahtá geainnu ala.
– Báikkis lea leahttomearri 80 kilomehtera diimmus, ja biillas lea leamaš arvat unnit leaktu go 80 km/d go lihkohisvuohta dáhpáhuvai, dadjá Grønnli.
