-Almmuhus-
OĐĐASATBiila badjel geainnu Šuoššjávrre bokte

Biila badjel geainnu Šuoššjávrre bokte

-

-

Duorastaga lei biilalihkohisvuohta Šuoššjávrris, juste Guovdageainnu ja Kárášjoga suohkan rájás.

Politiijat dieđihit ahte persovdnabiila lea vuodján badjel geainnu Šuoššjávrri bokte, juste Guovdageainnu ja Kárášjoga suohkanrájá bokte.

Politiijat leat mannan báikái ovttas ambulánssain ja buollinčáskadeddjiiguin.

Sii eai vel dieđe leago oktage roasmmehuvvon.

 

Bivdán helikoptera boahtit

Ávvira journalistta, Alice Balto guhte deaivvai leat báikkis, bođii báikái dakka maŋŋelaš lihkohisvuođa ja muitala biila lea boahtán Guovdageainnu guovllus, ja vuodján badjel mohkis, ovdalaš šaldi, mii lea Vuottašjoga rastá.

– Biila orro mannan luoddaáiddi badjel ja measta johkii geavvan bajábealde šaldi. Dál gullen ahte leat helikoptera maid bivdán boahtit, muitala Balto.

Ávvira dieđuid mielde finai suodjalushelikopter lihkohisvuođabáikkis, ja lea dál girdilan fas eret doppe.

 

– Nuppes dán dálvvi

Alf Kristian Eriksen, orru Šuoššjávrris ja oaidná stohpoláses hui bures geidnui.

Son muitala lea máŋgii vásihan lihkohisvuođa dán šaldi bokte.

– Dál lei nuppes dán dálvvi go lea lihkohisvuohta dákko, ja juste dál dolvojuvvui olmmoš helikoptera mielde, muitala son.

Eriksen lohká diet mohkki geainnus šaldi lahka ii leat nu mohkkái, muhto boahtá hui fáhkka, ja diekko lea 80 kilomehtera diimmus leahttomearri.

– Mu mielas lea maid beare alla leahttomearri diekko, ja jus lea gálja de lea bahá ribahit biilla badjel geainnu. Mun láven ballat dien mohkis šaldi lahka, go mus leat mánát ja go sii fitnet nuppe dálus de rasttildit šaldi.

– Mun lean viggan geaidnodoaimmahahkii dan dieđihit, muhto ii sidjiide leat vissa ávki ovdal olbmot duššet dies, lohká son.

 


SÁDDEJUVVUI HELIKOPTERIIN: Čihččet lohkkái nisu sáddejuvvui buohccivissui helikopteriin. Priváhta govva

Nisu roasmmehuvvan

Finnmárkku Politiijaguovllu operašuvdnaguovddážis muitalit váile diibmu njealjis, ahte čihččet lohkái nisu lea vižžojuvvon helikopteriin.

Politiijat leat dutkame ášši ja eai sáhte vel dadjat mii lea sivva go nisu lea vuodján badjel geainnu.

Sii eaige dieđe man bahut nisu lea roasmmehuvvon.

 

 

 

 

 

 

-Almmuhus-