-Almmuhus-
OĐĐASATBiibbala gándanamat bivnnuheamos diibmá

Biibbala gándanamat bivnnuheamos diibmá

-

-

Vaikke olu mánát ožžot biibbalnamaid, de eai leat norgalaččat dattetge šaddan eanet risttalažžan. Dán áigge válljejit unnit olbmot gásttašit mánáideaset ja unnit olbmot girkostallet.

Go geahčada 2017 nammastatistihkaid, de čájehuvvo ahte biibbala gándanamat leat bivnnuhat.

Logi eanemus bivnnut namaid searvvis leat guhtta biibbalnama, čájehit Statistihkalaš guovddášdoaimmahaga logut.

– Diimmá nammastatistihka bajimusas ledje biibbalnamat Jakob ja Lukas. Logi bivnnuheamos gándanamaid searvvis leat maiddái Filip, Noah, Elias ja Isak, muitala seniorráđđeaddi Jørgen Ouren geas lea ovddasvástádus nammastatistihkas.

 

Unnit gástamánát

Vaikke biibbalnamat leat bivnnuhat, de ii mearkkaš ahte norgalaččat leat šaddan eanet risttalaččat.

Statistihkat čájehit baicce ahte eai lihka olus gásttaš mánáideaset. 2006:s gásttašuvvo 73,9 proseantta Norgga mánáin, logi jagi maŋŋel lei lohku njiedjan 55,3 prosentii.

Girku massá maiddái miellahtuid ja eai lihka olus girkostala.

1970:s ledje 3,6 miljovnna olbmo miellahttun girkus, dat mielddisbuktá 94 proseantta Norgga álbmogis. 2016:s ledje 79 proseantta norgalačča miellahttun muhtin risttalaš oskkuservodagas.

 

Biibbalaš nieidanamat

Biibbala nieidanamat eai leat seamma bivnnuhat go gándanamat, muhto nieiddaid nammastatistihkas gávdnojit moadde ovdamearkka.

Sara lea 4. sajis, Maja (mii vuolgá Maria namas) lea 7. sajis ja Lea dahje Leah lea 11. sajis, dieđiha Statistihkalaš guovddášdoaimmahat.

-Almmuhus-