-Almmuhus-
OĐĐASATBiehttalit iskat nuoskkideame Biedjovákkis

Biehttalit iskat nuoskkideame Biedjovákkis

View all posts Journalista

-

-

Birasgáhttendirektoráhta gáibida ahte  Finnmárkkuopmodat (FeFo) galgá kártet nuoskkideame Biedjovákki ruvkebázahusain Guovdageainnu suohkanis.

FeFo mielas ii leat dat sin ovddasvástádus.  Jagi 2016 sáddii ge Birasgáhttendepartemeanta vuosttáš gáibádusa, njealját  ja maŋemuš gáibádusa leat sádden geassemánus dán jagi. 

– Mii oaivvildat ahte lea stáhta ovddasvástádus kártet ja čorget ruvkebázahusaid. Stáhta lei eananeaiggát go ruvkedoaibma álggahuvvui ja loahpahuvvui. Stáhta lea čađat leamašan goappaš bealde beavddi dán áššis, ja FeFo šattai eananeaiggát mealgat maŋŋá go ruvke doaibma nogai Biedjovákkis. Finnmárkulaččaiguin ii leat leamašan mearrádus váldi dán áššis, dat lea stáhta leamaš, dadjá FeFo advokáhta, Håvard Aagesen.

Son lohká FeFo boahtá váidalit gáibádusa mearrádusa. FeFo hálddaša 95 proseantta Finnmárkku eatnamiin, ja lea riikka nubbin stuorámus eananeaiggát. FeFo ásahuvvui jagi 2005.

STÁHTA OVDDASVÁSTÁDUS: FeFo advokáhta, Håvard Aagesen. Preassagovva: Jan Henrik Hætta/FeFo
STÁHTA OVDDASVÁSTÁDUS: FeFo advokáhta, Håvard Aagesen. Preassagovva: Jan Henrik Hætta/FeFo

Dáhttu čuolmma čielgaduvvot

Håvard Aagesen čállá reivves direktorahtii, geassemánu 20. beaivvi, ahte  orro leamen duođalaš eahpesihkkarvuohta  geasa gulla ovddasvástádus kártet, ja čorget, Biedjovákki. FeFo  čujuha ahte direktoráhta bealis lea leamašan nu jaskat dán ášši birra, dan rájes go vuosttáš gáibádus sáddejuvvui jagi 2016. FeFo čállá viidásat ahte sii leat ain dan oainnus ahte hilgot gáibádusa mas gáibiduvvo ahte FeFo galgá kártet ja čorget guovllu. 

– FeFo dáhttu ahte áššečuolbma, ja gean ovddasvástádus dat lea, čovdojuvvo, čállá Håvard Aagesen.

Doalahit gáibádusa

Birasgáhttendirektoráhta vástádus FeFo:i lea ahte sii doalahit gáibádusa. Sin árvvoštallan áššis lea ahte jáhkkimis lea nuoskideapmi ruvkebázahusain Biedjovákkis. 

– Min oainnus de lea dárbbašlaš kártet nuoskkideame váikkuhusaid gullevaš čázadagaide  báikkis, čállá direktoráhta.

Hilgo ovddasvástádusa

Biedjovákkis lea roggan veaikki ja golli, nu gohččoduvvon stáhta minerálaid. Birasgáhttendirektoráhta čujuha ahte ruvkedoaibma ii leat gullevaš nuoskkideapmi mii lea čađahuvvon stáhta bealis.

– Mii eat sáhtte oaidnit dán áššis ahte stáhta lea «álggahan dahje dahkan» juoidá mii galggašii dagahit ahte lea nuoskkideapmi. Fitnodat mii rokkai, Bidjovagge Gruber AS, lea heaittihuvvon álgogeahččin 1990 logus.  Lea váldonjuolggadus ahte lea eananeaiggáda ovddasvástádus  bearráigeahččat nuoskkideame eatnama alde ja siste, čállá direktoráhta vástádusas FeFo:i.

Birasgáhttendirektoráhta deattuha gáibádus sisdoallu lea dušše sáhka ráddjejuvvon gollorámmas.

– Mii eat leat vel mearridan lea go FeFo ovddasvástádus čorget, čállá direktoráhta. 

Váidalan áigemearri

FeFo lea ožžon áigemearri sáddet kártenprográmma direktoráhti, mii lei miesemánu 15. beaivvi 2023. FeFo:s lea golbma vahkku váidalan áigemearri, ja dat lea guoskevaš borgemánu 4. beaivvi rájes. Boastuvuođu geažil de  ii namuhuvvon váidalanriekti gáibádusas mii sáddejuvvui geassemánus, čállá Birasgáhttendirektoráhta e-poasttas FeFo:i.

 – Mii boahtit geavahit váidalan rievtti dán áššis, lohká FeFo advokáhta Håvard Aagesen. 

-Almmuhus-