Duorastaga hilggui Deanu gieldda sierralobilávdegoddi ođđasit Morten Bliena ohcamuša vuodjit Deanu alde skohteriin olahan dihte ođđa máilmmiolahusa.
Duorastaga hilggui Deanu gieldda sierralobilávdegoddi ođđasit Morten Bliena ohcamuša vuodjit Deanu alde skohteriin olahan dihte ođđa máilmmiolahusa.
Duogáš ohcamii lea ahte Morten Blien háliida geahččalit časkit máilmmiolahusa vuodjit skohteriin čázis, muhto dál cakkadit Deanu politihkkárat su niegu. Dálá máilmmiolahus lea 18 miilla ja Bliena plána lea vuodjit 25 miilla Kárášjogas Detnui skohteriin, muhto dasa dárbbaša sierralobi.
– In dieđe maid galgan dadjat, lean hui beahtahallan go vuot hilgo ohcamuša.
Mus ledje stuorát vuordámušat aŋkke ahte oidnet makkár vejolašvuođa dát addá márkanfievrridit gieldda, lohká deatnulaš Morten Blien oanehaččat go Ávvir riŋge.
Eahpesihkar čađaha go eará báikkis
Morten Blienis lea unnán sánit go Ávvir váldá oktavuođa dakka maŋŋá go mearrádus váldui ikte. Dál orru vuohttumin eahpesihkarvuohta šaddá go dán čavčča oba geahččalit ge časkit máilmmiolahusa.
– Dál in dieđe vuos maid barggan. Mu niehku lei vuodjit ruovttugielddas. Dál in dieđe galggan go geahččalit mearas vai Suomas čađahit plánaid, vai diktit plánaid leat niehkun, vástida Blien ja lasiha ahte Deatnu oažžu leamen unna Deatnu go eai oainne ođđa vejolašvuođaid.
Jierpmálaš mearrádus
Deanu sierralobilávdegoddi lei ovttajienalaš ja digaštalle ášši diimmu. Jođiheaddji Håvald Hansen čilge iežaset geahččalan árvvoštallat ášši guktuid beliid ja lohká sin mearrádus orui jierpmáleamos.
– Ii mu mielas leat dál riekta addit diekkár sierralobi. Máilmmiolahusa sáhttá bidjat eará sajis, mu jearaldat lea lea go Deanočázádat rivttes arena,
dadjá Hansen.
Hállu ovttas eará gielddain digaštallat
Su mielas lea maid čielggas ahte eará geavaheaddjit, nu go bivdit ja earát geat geavahit čázádagas, maid besset buktit cealkámuša dákkár áššái ovdal go addo makkárge sierralohpi.
– Mu mielas livččii maid lunddolaš ahte Ohcejohkii ja Kárášjohkii, gosa guoská dát ášši, livččii addon vejolašvuohta ovttas digaštallat ášši. Lea dan mađe erenomáš ášši, dadjá Håvald Hansen ja mieđiha leamašan váttis ášši.
– Dá lea min mearrádus
Håvald Hansen lohká dá lea lávdegotti loahpalaš mearrádus, ja jus dat ii leat dohkálaš eará politihkkáriidda, de fertejit loktet ášši viidásit ja čujuha ovdagoddái ja gielddastivrii.
– Dá lea min mearrádus dán áššis ahte hilgut su beassamis vuodjit Deanu alde skohteriin, dadjá sierralobilávdegoddi jođiheaddji.
Dohkkeha mearrádusa
Deanu sátnejođiheaddji Frank Ingilæ lohká iežas dohkkehit sierralobilávdegotti mearrádusa, muhto dattetge ii loga oaidnit makkárge váttisvuođaid jus livččii ožžon sierralobi.
– Lea lávdegotti váldi mearridit, ja mun dohkkehan sin mearrádusa vaikko mun livččen sávvan ahte livččii eará boađus, lohká Ingilæ.
(Ášši lea almmuhuvvon báberaviissas 20.08.15)
