Báikkálaš dohkkeheapmi ja almmolaš eaiggátvuohta leat dehálaččat bieggafápmoprošeavttaid ollašuhttimis, boahtá ovdan raporttas.
– Mis ii leat ráđđi dasa ahte olu Norgga gielddat dahket prinsihpalaš mearrádusaid bieggafámu vuostá, lohká Energiijadepartemeantta stáhtačálli Elisabeth Sæther (Bargiidbellodat) FriFagbevegelsii.
Norggas leat dál 65 bieggafápmorusttega ja oktiibuot 1392 bieggaturbiinna, ja maŋimuš 2,5 jagis ceggejuvvojedje dušše 11 bieggaturbiinna Norggas. Dan čálii Europower mannan geasi.
Dan jagi eai jáhke ceggejuvvot ođđa bieggaturbiinnaid, mii lea vuosttaš gearddi guđa jahkái. 17 Norgga gieldda leat maid dahkan prinsihpalaš mearrádusaid bieggafápmohuksema vuostá.
– Lea áibbas vejolaš ahte bieggáfápmohuksema dahkat vuoitun, muhto dalle fertejit suohkanat leat mielde, dadjá Sæther.
Raporta man Thema Consulting Group lea doaimmahan ovttas fitnodagaiguin Samfunnsbedriftene Energi, Kraftfylka, EL ja IT Forbundet ja Forbundet Styrkem, konkludere ahte báikkálaš dohkkeheapmi ja almmolaš eaiggátvuohta leat dehálaččat bieggafápmoprošeavttaid ollašuhttimis.
Raporttas čujuhuvvo dasa ahte leat moadde vuogi movt loktet baikkalaš dohkkeheami huksemii, earret eará ahte nannet gielddaid oamastanvuoigatvuođaid ja ekonomalaš movttiidahttima.
Birrasii 60 proseantta visot bieggafámuin Norggas leat olgoriikka fitnodagat mat oamastit.
(©NTB)
