-Almmuhus-
-Almmuhus-
VALÁŠTALLAN Biegga ii hehtten

Biegga ii hehtten

-

-

Diibmu 11:s vuoddjájedje Finnmarksløpet beanavuoddjit Álttá gávpotguovddážis. 

Álttá gávpotguovddážii ledje olusat čoahkkanan geahččat go Finnmarksløpet 2015 beanavuodjingilvvut rahppojedje. Tor Bjørnar Henriksen lei okta dain geat ledje boahtán geahččat vuolgaga.

 – Finnmarksløpet lea iešalddis leamaš institušuvdnan jo guhká, ja joatká leat dakkárin. Dán jagi leat Máilmmemeašttir gilvvut vel dasa lassin. Dál lea veaháš čoaska biegga muhto dat ii daga maidege, dáppe leat liikká olu olbmot ja dát sáddejuvvo TVs buoremus sáddenáiggis, ja das lea hirbmat stuorra mearkkašupmi sihke Finnmárkui ja Sápmái, dadjá movttegis geahčči.

 

Somá čuovvut

Henriksen lea Unjárggas eret, muhto orru Álttás ja son muitala iežas juohke jagi čuovvut Finnmarksløpet vuolgaga ja gilvvuid.

 – Jus eat leat doppe nuortan de gal lávet deike boahtit geahččat go vuoddjájit. Mus leat maid oahppásat ja skihpárat geat lávejit searvat dáidda gilvvuide ja dalle lea erenoamáš somá leat dáppe.

Ieš lohká erenoamážit čuovvut Áltálačča Sølvi Monsena ja Ole Sigleif Johansena, Rødbergas eret, geat searvaba FL 500 luohkkái.

 

Ođđa gilvoluohkká

Diibmu 11:s lei vuolgga, dán jagi leat njeallje gilvoluohká; FL-junior, FL500 RNB, FL 500 ja FL 1000. Juniorgilvvut čađahuvvojedje vuosttaš geardde diibmá, ja juniorvuoddjit vudjet Álttás Šuoššjávrái ja fas ruovttolutta. FL500 RNB lea ođđa luohkká masa servet beanavuoddjit geain leat čielgavarat polarbeatnagat, Siberian Husky, Ruonaeatnanbeatnagat, Alaska Malamute ja Samojed beatnagat.

 

Goas jovdet

Juniorvuoddjit vurdojuvvojit mollii ihttin. FL 500 luohkáid vuoddjit ges vudjet Álttás Leavvajohkii, gos jorgalit fas Áltái. Sii vurdojuvvojit mollii vuossárgga beaivvi mielde.

FL 1000 ges eai olle mollii ovdal áramusat duorastaga dahje bearjadatija mielde. 

Beanavuddjiid sáhttá čuovvut Finnmarksløpet siidduin.

 

- Advertisement -
-Almmuhus-