Rámbuvrrat ja boradanbáikkit gilvalit ja nu hálbu borramuš.
Statistihkalaš Guovddášdoaimmahaga logut čájehit ahte biebmohattit njidje 0,6 proseanttain borgemánus čakčamánnui, čállá Virke bargiidsearvi preassadieđáhusas.
– Biebmohattit njidje eanet go leimmet vuordán, dadjá Virke dagligvare bargiidsearvvi direktevra Ingvill Størksen. Konsumhaddeindeaksa lassánii diimma čakčamánus dan jagi čakčamánnui obbalaččat 1,5 proseanttain, muhto biebmohattit lassánedje dušše 0,8 proseantta seamma áigodagas.
– Rámbuvrraid gaskka lea garra gilvvohallan, ii ge dušše gávpeovttastusrámbuvrraid. Sihke boradanbáikkiin ja rámbuvrrain, gos vuvdet feara maid, gilvalit oažžut olbmuid gávppašit sin luhtte. Dat boahtá álbmogii buorrin go ožžot biepmu hálbbibun, loahpaha Størksen.
