Biebmomeassut Guovdageainnus válgabeaivvi

Guovdageainnus leat dán jagi sirdán válgabáikki. Ovddit jagiid lea leamašan kulturviessu válgabáikin, muhto dál lea dat sirdon Báktehárjái. Buot bellodagain lea iežas válgabáiki, earret Risttalaš bellodat, geat eai oba lean ge Báktehárjji olggobealde, ja Gurut geain ii lean báiki. Dat mii lea mearkkašahtti lea go válgabáiki lea dego livčče biebmomeassut. Doppe beassá odne máistit vuššon čuovžža, goikebierggu, vuššon, varas bohccobierggu, basson sarvabierggu, biđđosa, ja ieš guđetlágan gáhkuid ja njálgáid.

– Mu áigge eat astan ná

Ii leat álot leamašan nu ahte measta borramuš lea guovddážis válgabeaivvi. Ovddeš sátnejođiheaddji Guovdageainnus 76-jahkásaš Ole Henrik M. Buljo, ii loga su áiggis gal leamašan dákkár meassut:

– Mii gal eat astan dalle dákkár doaluid doallat. Dalle galge politihkkárat leat ieža geat barge váldit vuostá jienaid, nu ahte dalle gal lei dušše prográmmaid juohkit olbmuide ja jur gáfe guossohit. Láviimet maid fitnat olbmuid luhtte

Varrabánnegáhku guossu

Buljo lea Sámeálbmot Listtu campingvovnna olggobealde go Ávvir suinna humada. Go son čohkká das, de buktá Sámeálbmot Listtu nubbievttohas varrabánnegáhku sutnje.

– Gal don oainnát, herskkot, lohká son.

Máid guhtege guossohii:

Bargiidbellodat lei biđđán ja láibon nisuláibbi. Sii fálle maid eppelgáhku ja earálágan gáhkuid:

Sámeálbmot Listu guossuhii varrabánnegáhkuid, váffeliid, ja eará gáhkuid:

Guovddášbellodat guossuhii váffeliid:

Sosialisttalaš Gurutbellodat guossuhii dábálaš forbmagáhku:

Dáloniid listu fálai basson, varas sarvabierggu, basson spiinnebierggu, ja buđetsaláhta:

Johttisápmelaččaid listu fálai vuššon, varas bohccobiergu:

Ovddádusbellodat ja Olgeš ledje searvan oktasaš válgabáikái:

Ovddádusbellodat fálai vuššon čuovžža. Olgešbellodat ges fálai goikebierggu ja njálgáid.