Biebmobearráigeahčču ávžžuha buohkaid, geat oidnet váibbat dahje lápmahuvvan bohccuid, dieđihit dan báikkálaš boazodolliide, politiijaide dahje Biebmobearráigehččui. Dán muttos jagi sáhttet váttis guohtundilálašvuođat dahkat bohccuid ceavzima ovdii, ja danne lea hui deaŧalaš ahte bohccot eai ráfehuhtto dárbbašmeahttumit.
Biebmobearráigeahčču ávžžuha buohkaid, geat oidnet váibbat dahje lápmahuvvan bohccuid, dieđihit dan báikkálaš boazodolliide, politiijaide dahje Biebmobearráigehččui. Dán muttos jagi sáhttet váttis guohtundilálašvuođat dahkat bohccuid ceavzima ovdii, ja danne lea hui deaŧalaš ahte bohccot eai ráfehuhtto dárbbašmeahttumit.
Diimmá giđa ledje váttis dilálašvuođat máŋgga boazoguohtunguovllus. Go de vel čuovui galbma geassi ja čakča, de ledje olu bohccot dálvvi guvlui heajut vuoimmis go muđui livčče ja ledje heajut návccat ceavzit badjel dálvvi goas guohtumat leat váddása duohken, čállá Biebmobearráigeahčču preassadieđáhusas.
– Lihkus leat máŋgga sajis leamaš buorit guohtumat, muhto olu bohccot ledje heajos vuoimmis juo ovdal dálvvi. Mii sávvat ahte eat dárbbaš šat menddo guhká vuordit giđa, ja ahte sihke giđđat, geasset ja čakčat livčče buorit guohtumat, lohká Biebmobearráigeahču Finnmárkku ossodaga ossodathoavda Siv June Hansen preassadieđáhusas.
Biebmobearráigeahčču ávžžuha olbmuid dieđihit jus oidnet bohccuid mat orrot leame heajos vuoimmis.
– Buohkat geat várohit dahje dihtet bohccuid main ii leat buorre dilli, galget dieđihit farggamusat, lohká Siv June Hansen.
Fuolalaččat čuovvut mielde
Biebmobearráigeahčču muittuha maiddái ahte lea hui deaŧalaš ahte boazodoallit atnet bohccuideaset čalmmis, earenoamážit dál giđđadálvvi.
Fargga álgá guottet, ja danne lea deaŧalaš ahte njiŋŋelasat ožžot ráfi vai buoremus lági mielde birgejit giđa guvlui.
Dassážii go guohtundilálašvuođat fas buorránit lea hui deaŧalaš ahte ealut leat geahču vuolde, earenoamážit geahnoheamos bohccot.
Ferte leat dan meare buorre bearráigeahčču ahte buohcci ja váibbat bohccot fuomášuvvojit jođánit, ja earenoamážit fuolahit bohccuid mat mannet sierra livvadit. Ii oktage boazu galgga guđđojuvvot nu ahte sáhttá iešalddis jápmit, dahje eallinaga borahallat boraspiriide, čállá Biebmobearráigeahčču.
– Váibbat bohccuid galgá juogo dakkaviđe heakkahuhttit, dahje áimmahuššata erenoamážit. Lea boazodolliid ovddasvástádus dan fuolahit. Dát lea dieđusge deaŧalaš álo, muhto lea earenoamáš áigeguovdil dán muttus jagi, lohká Siv June Hansen preassadieđáhusas.
