Trøndelága fylkkamánni bivdá olbmuid unnimus lági mielde gárdái bidjat ealuid ja ráhkkanit dillái jus badjeolbmuide boahtá Koronadávda.
Trøndelága fylkkamánni ávžžuha badjeolbmuid čuovvut doaimmaid maid Álbmotdearvvašvuođainstituhtta (FHI) lea bidjan eastadandihte koronavirus leavvama.
Fylkkamánniin váldit oktavuođa rátkimiid birra
Koronavirus njoammu jođánit, ja dearvvašvuođaeiseválddit ávžžuhit olbmuid doallat unnimusat mehtera gaskka eastadandihte dávdda njoammuma. Dát sáhttá leat hástalussan go ealut leat gárddiin, ja danne ávžžuhit ráddjet rátkiimiid nu olu go vejolaš.
– Stuorámus riskabealli dávdda njoammuma ektui boazodoalus lea go ealut leat gárddiin. Danne bivdit olbmuid ráddjet rátkimiis nu olu go vejolaš, erenoamážit jus ránnjásiiddaid olbmot bohtet, čállet Trøndelága fylkkamánni neahttasiidduin.
Jus lihkká lea dárbu gárdái bidjat ealu, de ferte dát čielggaduvvot Fylkkamánniin.
Ávžžuhit bures ráhkkanit jus siiddaolbmot njoammuduvvet
Fylkkamánni boazodoalu ossodagas ávžžuhit orohagaid bures ráhkkanit ja bidjat buriid plánaid mo gieđahallat dili jus guođoheaddjit biddjojit errenáigái dahje buohccájit koronadávddain.
