Kongreassa ja várrepresideanta leat formálalaččat dohkkehan Joe Bidena presideantaválgga vuoitin. Ovddeš presideanta, Donald Trump, lohpida ráfálaš fápmosirdima.
Demokráhta Joe Bidena válgavuoittu dohkkehedje duorastatija formálalaččat várrepresideanta Mike Pence ja Kongreassa, ja Biden virgáibiddjo USA 46. presideantan ođđajagemánu 20. beaivvi.
– Vaikke mun in leat obanassiige ovttaoaivilis válgga bohtosiin, ja mus leat duohtadieđut iežan bealde, de šaddá čorgadis fápmosirdin ođđajagemánu 20. beaivvi, dadjá Trump cealkámušas mii boahtá USA Vilges Viesus.
Oallugat rievdadedje oaivila
Ovdal go sešuvdna bissehuvvui veahkaválddalaš stajideddjiid geažil geat bahkkejedje kongreassasálii, de ledje olu republihkalaš vuosteákkat Arizona válggaide – vuosteákkat maid vuostá jienastuvvui.
Go sertifiserenseremoniija fas álggii, measta guhtta diimmu maŋŋel go Kongreassa lei heaittihuvvon, de ledje máŋga republihkalačča gáhtan ja rievdadan oaivila.
Ovttas olu earáiguin lei republihkalaš senáhtor Kelly Loeffler Georgias rievdadan oaivila, ja jienasteamis baicce dohkkehii válgadelegáhtaid bohtosiid, čállá New York Times.
– Go ollejin Washingtonii iđđes, de in áigon dohkkehit válgajienaid. Dáhpáhus mii odne geavai, bággii mu rievdadit oaivila. In sáhttán buriin oamedovdduin vuosttaldit, dajai Loeffler.
Republihkalaččat Scott Perry (Pennsylvania), Ted Cruz (Texas) ja Josh Hawley (Missouri) leat muhtimat sis geat doalahedje iežaset vuosteákkaid Pennsylvania válgabohtosiidda vaikke stuimmit dáhpáhuvve. Dattetge jienastuvvui daid vuostá sihke Representánttaid viesus ja Senáhtas.
Vaikke republihkalaččat ledje dieđihan ovddalgihtii, de eai boahtán vuosteákkat Georgia dahje eará stáhtaid válgii, dušše Pennsylvanias ja Arizonas.
Pence dohkkehii
Dohkkeheapmi maŋiduvvui stuimmiid geažil ja manai njozet. Sullii 03.40 áigge duorastaga čuovganeapmái manai dohkkeheapmi 270 válgadelegáhta rájá meaddel.
Várrepresideanta Mike Pence dohkkehii Bidena válgga, ja vuosttaldii Trumpa sávaldaga. Republihkalaččaid eanetlohkojođiheaddji Mitch McConnell cuiggodii kongreassavistti falleheami.
– Sii geahččaledje váikkuhit min demokratiija. Sii eai lihkostuvvan. Sii eai nagodan hehttet Kongreassa, dajai McConnell.
Isolerejuvvon sosiála mediain
Trump lei stuimmiid siste gaskaboddosaččat isolerejuvvon buot sosiála mediain, ja su cealkámuš fápmosirdima birra ii ollen su dábálaš vuođđolávddiide.
– Mun lean álo dadjan ahte mii galgat joatkit rahčamušain áittardit ahte dušše lobálaš jienat lohkkojit. Dan botta go dát ovddasta loahpa fámolaččamus vuosttašáigodaga presideantahistorjjás, lea dát dušše álgu min rahčamušas «Make America Great Again», dajai Trump cealkámušas.
Gaskavahkku ođđajagemánu 20. beaivvi, guovtti vahkku geahčen, šaddá Joe Biden USA 46. presideantan.
(©NTB)
