Elfrid Boine galgá odne leat biddjon eret ráđđeolmmáivirggis.
Elfrid Boine galgá odne leat biddjon eret ráđđeolmmáivirggis.
Ávvira dieđuid mielde lea Kárášjoga gielda dieđihan ossodathoavddaide ahte Elfrid Boine ii doaimma šat gieldda ráđđeolmmájin, son galgá leat biddjon eret barggustis.
Su ovddas lea Kurt Maurstad konstituerejuvvon ráđđeolmmájin.
– Sáhtán duođaštit ahte lean odne konstituerejuvvon doaibmi ráđđeolmmájin, buot eará kommentáraid fertet oažžut doaibmi sátnejođiheaddjis, John Nystadas, lohká Maurstad duorastaga.
Boine ii kommentere
Ávvir lea leamaš Elfrid Boine ságain, son ii hálit kommenteret ášši.
– Mun čujuhan dušše doaibmi sátnejođiheaddjái, lohká son.
Miessemánus diibmá lei Boine cealkán eret virggistis, sivvan dasa galgá leamaš heajos gulahallan ja bálkásoahpameahttunvuohta gaskal Kárášjoga ráđđealbmá Elfrid Boine ja Kárášjoga politihkalaš jođiheami.
Dieid áššiid njulgejedje ja Boine jotkkii virggistis.
Boine lea ovdal maid leamaš garra biekkaid siste ráđđeolmmájin, dan nu gohčoduvvon «Utøyaruhta-ášši» geažil.
Ieš dieđihan
iFinnmark čállá ahte Boine galgá ieš leat e-poastta bokte dieđihan gielddabargiide ahte lea biddjon eret ráđđeolmmáiámmáhis, ja ahte čorgegoahtá kantuvrra.
Ovdagoddi mearridan
Ságat ges čállá ahte odne, duorastaga, lei Kárášjoga gieldda ovdagottis čoahkkin Elfrid Boiniin, gos áidna ášši áššelisttus lei Boine bargu ráđđeolmmájin.
Dán čoahkkimis ii galgga leamaš okta ge opposišuvnna bealis, dušše várresátnejođiheaddji John Nystad Sámeálbmot Bellodagas ja sin ovttasbargoguoimmi, Bargiidbellodaga, ovddasteaddjit.
Politihkkárat galget čoahkkimis leat bivdan Boine geassádit virggistis, go dasa ii miehtan, de mearridedje lihccut su.
Dán galgá dattetge gielddastivra loahpalaččat mearridit.
Ávvir lea geahččalan oažžut John Nystada ságaide, duođaštit ahte ná lea dáhpáhuvvan, muhto eat leat lihkostuvvan.
Eai kommentere konkrehta áššiid
Ávvir lea leamaš Gielddaid Guovddášlihtu ságain, doppe eai hálit moktege kommenteret konkrehta ášši, eai obbalaččat ge kommentere.
Sii baicce čujuhit njuolggadusaide mat gusket álbmotválljejuvvon olbmuid bargoaddiovddasvástádussii, maid mielde ii sáhte eará go gielddastivra virgádit ráđđeolbmá. Virgádeami ii sáhte delegeret eará orgánii.
Njuolggadusain maid celko ahte ráđđeolmmái lea olles gielddastivrra ráđđeolmmái, dat mearkkaša ahte ráđđeolbmá ii sáhte lihccut eará go gielddastivra.
