Ráđđehus áigu fievrridit Finnmárkku ja Davvi-Romssa ovdamoniid eará boaittobealsuohkaniidda ja nu sihkkut oahppoloanaid.
– Boahtte stáhtabušeahtas mii veahkehit studeanttaid. Mii áigut unnidit oahpahusvealggi 25 000 ruvnnuin jahkásaččat, dadjá stáhtaministtar Jonas Gahr Støre (Bb) NTB:i.
Ráđđehusas lea mihttu ja sávaldat ahte olbmot ásaiduvvet dakkár báikkiide gos eai leat nu olu olbmot go dákkár ortnegiid ásahit.
Ortnet nannejuvvo seammás Finnmárkkus ja Davvi-Romssas, gos ássit juo jahkásaččat ožžot sihkkojuvvot oahppoloanaid.
– Lea duođalaš dilli. Nuorat fárrejit eret boaittobealsuohkaniin ja gielddain ja boares olbmot báhcet, čilge son.
60 000 ruvnnu
212 gieldda ja suohkana ožžot seamma ovdamoniid go davvi-norgalaččat. Støre háliida dásset erohusaid olbmuid gaskkas, muhto maiddái riikkas iešguđet guovlluid.
Finnmárkkus ja Davvi-Romssas lea dál nu ahte jahkásaččat sihkkojuvvo 20 proseanta oahppoloanas, eanemusat 30 000 ruvnno jahkái. Vuođđoskuvllaoahpaheddjiin sihkkot lassi 20 000 ruvnnu vela.
Dál ortnet viiddiduvvo nu ahte buohkat geat orrot dain 212 gielddain dahje davvin, besset sihkkut 60 000 ruvnnu oahppoloanas.
Ortnet doaibmagoahtá ođđajagimánus 2026.
