-Almmuhus-
SMÁVVAOĐĐASATBesset ráhkadit diehtojuohkin­filmma bátne­dearvvašvuođa birra 

Besset ráhkadit diehtojuohkin­filmma bátne­dearvvašvuođa birra 

-

-

Sámediggeráđđi juolluda 134 000 ruvnnu Málatvuomi bátnedivššohahkii Romssa ja Finnmárkku fylkkasuohkanis, vai besset ráhkadit sámi mánáide diehtojuohkinfilmma bátnedivššu birra. 

– Sámedikki mielas lea buorre go Romssa ja Finnmárkku fylkkasuohkan, Málatvuomi bátnedivššohaga bokte oidnet dárbbu buvttadit sámegielat diehtojuohkinmateriálaid, ja go váldet badjelasaset barggu buvttadit sámegielat filmma mii lea heivehuvvon mánáide ja nuoraide, lohká sámediggeráđđi Runar Myrnes Balto (NSR) preassadieđáhusas.

Filbma galgá movttiidahttit mánáid suohtas vugiin áimmahuššat iežaset bániid. Filbma galgá ovddidit máhtu sámi mánáid bániid ja bátnedivššu birra mánáidskuvlaagis vai eastadivčče bátnemieskama ja bátnedearvvašvuođabárttiid main sáhttet stuora váikkuhusat maŋit áigái.

Oassin oahpahusas

Filbma galgá oassin skuvlla oahpahusas ja bátnedivššáriid eastadanbarggus. Go mánát besset oahppat juoidá ođđasiid iežaset eatnigillii, de addá dat eanet ipmárdusa ja beroštumi fáddái. 

– Sámedikki mielas dát sáhttá leat ávkkálaš reaidu dasa ahte ovddidit buori bátnedivššu, ja dan bokte váikkuhit buoret mielladearvvašvuhtii. Rievttes ja buorre diehtojuohkin galgá mielddisbuktit eanet máhtu bátnedearvvašvuođa birra ja maid mielddisbuktit eanet mánáin unnit dárbbu dikšumii, ja dan bokte maid unnidit bátnedikšunáŧestusa, lohká Myrnes Balto. 

134 000 ruvdnosaš doarjja juolluduvvo doarjjaortnegis «Doarjja dearvvašvuođa-, fuolahus- ja mánáidsuodjalusprošeavttain», vuoruheamis «Prošeavttat mat nannejit sámi mánáid ja nuoraid psyhkalaš dearvvašvuođa».

-Almmuhus-