Guovdageainnus bistet dán vahkkoloahpa duodjemárkanat guokte beaivvi, ja vuhttui maid ahte olbmot eai lean de nu hohpohallán vuolgit gávppašit. Geahča video ja govaid áššis!
Odne álge duodjemárkanat Guovdageainnus. Birrasiid 70 fitnodaga leat čoahkkanan márkaniidda Báktehárjjis, mat leat dál šaddan juo jahkásaš márkanat.
Ođas dán jagi lea ahte duodjemárkanat bistet guokte beaivvi. Daid maŋemuš jagiid leat logat luohkát lágidan márkaniid. Váhnen, ja okta lágideddjiin Berit Marie E. Eira muitala ahte sii oidne diibmá juo, go dihte ahte galget nuppi jagi ieža lágidit, ahte áigot doallat márkaniid guokte beaivvi.
Son čilge ahte go leat nu olu olbmot, ja nu olu vuovdit, de ferte guokte beaivvi doallat márkaniid, vai buohkat ollejit geahččat buot gálvvuid.
Báktehárji láve spaggadievva go leat duodjemárkanat, muhto dál orui nu ahte olbmot eai lean hohpohallán vuos bearjadaga dohko vuolgit, go lea vel olles lávvordat beaivi márkanastit.
Sihke siste ja olgun
Sullii 70 fitnodaga leat vuovdime gálvvuideaset márkaniin, ja dat leat buot lágan duojárat. Silbačeahpit, garraduojárat, dipmaduojarat, girjelágádusat, ja nu ain. Leat maid muhtin fitnodagat olggobealde Báktehárjji, geat vuvdet biepmuid.
Eira muitala ahte sii hirpmahuvve go almmuhedje márkaniid, man oallugat dieđihedje ahte áigot searvat. Ledje oallugat geat eai oba ožžon ge saji márkaniidda, ja riŋgejedje sihke ikte ja odne jearrat saji.
Áibbas ‹‹varas›› girji
Sara K. Hætta, dahje ‹‹Jortamovra-Sárá›› ođđa girji ‹‹Čuoldin›› bođii njuolga prentehusas Álttás, duodjemárkaniidda Guovdageidnui.
Son guhte lei vuovdime girjji Báktehárjjis, ja lea veahkkin bargan girjjiin, Berit Margrethe Oskal, muitala ahte sii leat juste duodjemárkaniid váste prentehan girjji.
Dál eai lean vuos eará 20 girjji vuovdemassi, ja girječálli lea vuolláičállán buot girjjiid. Girjji almmuheapmi ii leat ovdal boahtte vahkkus, ja de oažžu dan girjegávppiin.
Skuvlatuvrii čoaggime ruđa
Skuvlamánát vuvdet biđđosa, gáhkuid ja gáfe, vai guossit besset snoabihit. Logat luohkká lea čoaggime ruđa, vai giđđat besset vuolgit klássatuvrii, ovdal go gerget nuoraidskuvllas.
–Mii leat doallan olu doaluid, ja čoaggán olu ruđa. Muhto skuvlamánát eai leat vel mearridan gosa sii áigot vuolgit, muhto dat orru nu ahte lieggariikka dat lea mii geasuha, muitala Berit Marie.
Son lohká ahte fertejit oaidnit guhkas besset go leat čoaggán ruđa. Leat olu doalut maid vel galget lágidit, nu go sámi álbmotbeaivvi doalut, ja juovlakaféa.
