Deanus lea dál álkit iskat lea go ožžon nuoskkesdávdda klamydia ja mykoplasma. Dearvvašvuođadivššár Ingunn Eriksen lohká olbmot heahpanaddet go áigot váldit iskosa.
Deanus lea dál álkit iskat lea go ožžon nuoskkesdávdda klamydia ja mykoplasma. Dearvvašvuođadivššár Ingunn Eriksen lohká olbmot heahpanaddet go áigot váldit iskosa.
Dál besset olbmot Deanus ieža iskkadit leat go sii ožžon nuoskkesdávdda klamydia. Finnmárkku fylkkagieldda doarjagiin beassá Deanu dearvvašvuođaguovddáš dál fállagoahtit nu gohčoduvvon «ruovttuiskkadeami», ja Deatnu leage vuosttaš gielda Finnmárkkus mii fállá dákkár fálaldaga.
Olu «sevdnjes logut»
Dearvvašvuođadivššár Ingunn Eriksen lohká iežaset diehtit ahte Deanus lea eanebuin klamydia go dat maid logut čájehit, ja ođđa iskkadanvejolašvuođain sávvet eanebuid oažžut divššu.
– Leat ollu nuorra ollesolbmot geat bohtet ruoktot Detnui luomus ja leat fitnan feasttain, ja mannet ruovttoluotta stuorra gávpogiidda iskkadit leat go sii ožžon nuoskkesdávdda. Sii leat de hui hirpmahuvvan go ožžo dan go ledje fitnan ruovttus Deanus. Dát logut eai boađe Deanu loguide, dadjá dearvvašvuođadivššár Ingunn Eriksen.
Álkis vuohki
Deanu dearvvašvuođaguovddáža hivssegiin leat ruškes konvoluhtat maid siste lea buot maid dárbbaša go áigu iskat iežas.
– Bártniide lea cissaiskkusláse, ja nieiddaide bumbolsággi mainna váldet ieža iskosa cinnáráiggis. Iskosiid, maidda darvvihit báhpira iežas namain, bidjet de konvoluhta sisa, ja sáddejit poastta mielde. Iskosiid bohtosat sáddejuvvojit dearvvašvuođaguovddážii, ja jus lea dávda, de váldá dearvvašvuođaguovddáš oktavuođa olbmuin, čilge dearvvašvuođadivššár Ingunn Eriksen.
Váldá mielde skuvllaide
Dearvvašvuođadivššár áigu dáid iskkuskonvoluhtaid váldit mielde go galleda gieldda skuvllaid, nu ahte juohkehaš gii háliida sáhttá oažžut dakkára. Dáinna lágiin sávvá dearvvašvuođadivššár ahte eanebut iskkadit lea go sis nuoskkesdávda, mii njoammu jus ii geavat gummi anašettiin.
– Ovdamunni dáinna lea ahte lea álkit váldit iskosa, ja iskosa sáhttá maid vaikko ruovttus váldit, jus dan háliida, lohká dearvvašvuođadivššár.
Heahpanaddet
Ingunn Eriksen lea olu jagiid bargan sexologan ja buohccedivššárin, ja lea máŋga jagi bargan Sex og Samfunn guovddážis Oslos, gos earret eará barget olu eastadit njoammumis nuoskkesdávddaid. Son muitala ge iežas duođaid beroštit dán áššis, ja lohká vásihit ahte lea olu heahpu čadnon nuoskkesdávddaide, ja olbmuid eai duosttastuva báljo doaktára lusa vuolgit dan geažil. Juste dan dihte lea ge sus hui jáhkku ahte veahkeha go ieža besset váldit iskkadeami.
Ingunn Eriksen sávvá eará gielddaid maid váldit oahpu sin ođđa fálaldagas.
