Ealgabivdit eai dárbbaš eará go oanehis kurssaža ovdal go besset vuovdit dohkkehuvvon biergguid.
Dál besset bivdit ieža dárkkistit sarvvabiergguid ovdal go vuvdet daid giehmánniide ja earáide, dát vejolašvuohta rahppo go leat ođđa našunála njuolggadusat sarvvabierggu dárkkisteami ja vuovdima dáfus,
– Go lea gealbu hygienalaččat biergguid rádjat de sáhttá dat maid buoridit biergokvalitehta, čállá FeFo preassadieđáhusas.
Álkit ja hálbbit
FeFo ovttasbargá Vuovdedoalu Kursainstituhtain ja ruhtada kurssa iešmávssu.
Nu šaddá bivdiide álkit ja hálbbit vuovdit biergguid, seammás go biergu lea dohkkehuvvon.
Biebmobearráigeahčču lea duđavaš ortnegiin ja geahpeda dalle iežaset dárkkistemiid bivdojoavkku dárkkistanbáikkis.
Kurssas ohppet oasseváldit Biebmobearráigeahču gáibádusaid mielde dárkkistit sarvvabiergguid. Mihttu lea maid buoridit biergokvalitehta ja nannet sarvvabierggu árvvu.
Kurssat lágiduvvojit Guovdageainnus, Kárášjogas ja Vuonnabađas miessemánu álggus. Dieđihanáigemearri dievvá miessemánu 1. beaivvi ja kursii sáhttá dieđihit skogkurs.no siiddu bokte.
