-Almmuhus-
-Almmuhus-
OĐĐASATBesse fitnat ođđa skuvla­vistti siskko­bealde: – Attii veaháš «aha» -dovddu

Besse fitnat ođđa skuvla­vistti siskko­bealde: – Attii veaháš «aha» -dovddu

-

-

Máŋga mojunjálmmi oidnojedje gussiin go besse Guovdageainnu ođđa skuvlavistti siskkobealde fitnat geahččame movt huksenbargu lea ovdánan ja makkárin visti lea šaddame.

Mánnodaga besse Guovdageainnu skuvlla rektor, geavaheaddjekoordináhtorat, politihkkárat ja eará bovdejuvvon guossit fitnat geahččame Guovdageainnu ođđa skuvlavistti siskkobealde. Prošeaktajođiheaddji Nils Erik Toft, gii WSP fitnodaga bokte jođiha huksenprošeavtta, lei bovden gussiid diđošteapmái go skuvlahuksen lea ovdánan dan muddui ahte visti lea measta ollásit gokčojuvvon.

– Lea dábálaš doallat čalmmustahttima dan oktavuođas go vistti seainnit ja dáhkki leat snihkkejuvvon gitta. Visti ii leat ollásit giddejuvvon, muhto dál leat ollen dan muddui ahte bargagoahtit eambbo siskkobealde vistti, dajai Toft go sávai buresboahtima gussiide.

Prošeaktajođiheaddji lohká dehálažžan ahte báikkalaš olbmot, bargit ja politihkkárat besset oaidnit ahte bargu ovdána. Son lohká huksenbarggu manname plána mielde ja ahte visti galgá geigejuvvot suohkanii skábmamánu loahpageahčen.

– Mii diehtit ahte politihkkáriin ja hálddahusbargiin lea stuora beroštupmi dán prošektii mii lea okta dain stuorámus huksenprošeavttain mii Guovdageainnu suohkanis lea leamaš. Midjiide lea dehálaš doallat singuin oktavuođa, juohkit dieđuid ja čájehit ahte bargu ovdána, lohká Toft.

«GEAHČČALANÁIGI»– Maŋŋel go mii leat geigen vistti suohkanii, de leat WSP bealis lohkan ahte lea dárbu guokte mánu várret fárremii ja oahppat movt visti doaibmá, dadjá Nils Erik Toft. Govven: Iselin Skum
«GEAHČČALANÁIGI»– Maŋŋel go mii leat geigen vistti suohkanii, de leat WSP bealis lohkan ahte lea dárbu guokte mánu várret fárremii ja oahppat movt visti doaibmá, dadjá Nils Erik Toft. Govven: Iselin Skum

– Jáhkán dat lei hui mávssolaš sidjiide geat besse fitnat geahččame barggu ovdáneami odne. Jáhkán lei earenoamáš mávssolaš geavaheaddjekoordináhtoriidda  oaidnit vistti, geat leat čuvvon guovtti jagi prošeaktabarggu, ja geat leat leamaš mielde mearrideame makkárin skuvla galgá šaddat.

Son lohká ahte nuppes go bovdejit gussiid diđošteapmái, lea go visti lea gárvvis.

– Maŋŋel go mii leat geigen vistti suohkanii, de leat lohkan ahte lea dárbu guokte mánu várret fárremii ja oahppat movt visti doaibmá, dadjá Nils Erik Toft.

– Addá buori dovddu

Geavaheaddjekoordináhtorguovttos, Ole Einar Hætta ja Elle Helene Siri, leigga hui ilolaččat go beasaiga vuosttaš geardde oaidnit movt ođđa visti šaddá siskkobealde.

– Attii measta dego dakkár «aha» -dovddu beassat deike. Dál oaidnit rámmaid movt lanjat leat jurddašuvvon ja visti orru addime hui olu vejolašvuođaid. Visti orru čuovgat ja rabas. Allat dáhke vuolde ja ollu áibmu. Vaikko dáppe leat ain bargame, de oažžut goit veaháš gova das movt dat šaddá. Lea earenoamáš boahtit deike, leat čuvges seainnit, ealli seainnit, ja mun jáhkán go visti gárvána eambbo, de šaddá vel buoret dovdu. Mus lea dál juo hui buorre dovdu ja lea dego vuordit juovlaruohta. Lea dego livččii oainnestan veaháš maid eadni lea oastán juovlaskeaŋkan ja galgá vuordit dassái go beassá rahpat dan.

– Mun sávan dán vistti addit vejolašvuođa ovdánahttit sihke ohppiid, bargiid ja olles skuvlla, lohká Hætta.

– Lei hui earenoamáš boahtit deike ja oaidnit ahte prošeakta lea duohtan šaddame. Mii leat dán proseassas leamaš hui guhká ja oaidnán dušše báhpiris makkárin dat šaddá. Dál beasaimet oaidnit albma duođas ja oaidnit ahte lea ollašuvvame. Dat addá hui buori dovddu, dadjá Siri.

Geavaheaddjekordináhtorguovttos Elle Helene Siri ja Ole Einar Hætta illudeaba dassá go lea áigi fárret ođđa skuvlavistái.. – Mun sávan dán vistti addit vejolašvuođa ovdánahttit sihke min ohppiid, bargiid ja olles skuvlla, lohká Hætta. Govven: Iselin Skum
Geavaheaddjekordináhtorguovttos Elle Helene Siri ja Ole Einar Hætta illudeaba dassá go lea áigi fárret ođđa skuvlavistái.. – Mun sávan dán vistti addit vejolašvuođa ovdánahttit sihke min ohppiid, bargiid ja olles skuvlla, lohká Hætta. Govven: Iselin Skum

Beassan váikkuhit hábmemii

Vaikko muhtun osiin ja lanjain visttis eai leat vuos eará go fiellut sajis, de oaivvildeaba Hætta ja Siri ahte visti lea beaktilit huksejuvvome ja ahte visttis eai leat «dušši« areálat. Soai leaba čuvvon guovtti jagi prošeaktabarggu ja doaibman prošeaktajođiheaddji ja skuvlla boahttevaš geavaheddjiid gulahallangaskaoapmin. Sii leat golmmas geat doibmet geavaheaddjekoordináhtorin ja sis leat juohke vahkku čoahkkimat gos čuvvot prošeavtta ovdáneami.

– Muhtun lanjat ja oasit visttis leat stuorábut ja eará lanjat ges eará ládje go leimmet govvidan ja báhpiris oaidnán. Mun illudan oaidnit makkárat duodjelanjat šaddet, go mis šaddet sihke dipma-ja garraduodjelanjat, dadjá Siri.

– Oahpahuslanjaide bohtet dieđusge ođđaáigásaš rusttegat, muhto obbalaččat dat leat sullii seammaláganat. Lea miellagiddevaš oaidnit makkárat dat lanjat šaddet gos dáhpáhuvvet earenoamašvuođat – nu go musihkka, luonddufága, duodjefága ja nu ain. Lea illudahtti oažžut albma lanjaid daid fágaid váste, lohká Hætta

Geavaheaddjekoordináhtorat leat leamaš mielde mearrideame guđet rusttegat lanjaide galget. Bargu ovddosguvlui lea válljet earret eará luovos dávviriid lanjaide.

Ii olle nu guhká vázzit ođđa skuvllas

Ole Herman Hætta (14) lea nuoraidskuvlla ohppiidráđis válljejuvvon čuovvut ođđa skuvlla prošeavtta. Plána mielde galget oahppit fárret ođđa skuvlavistái boahtte skuvlajagis, giđa beallái, muhto de ii olle Ole Herman go moadde mánu ođđa skuvlla vásihit ovdal go álgá joatkkaskuvlii.

– FIIDNÁMUS LATNJA LEA VÁLDOLATNJA: Ole Herman Hætta sávvá ahte oahppit besset boahtte skuvlajagi mielde fárret ođđa skuvlavistái vai beassá vásihit movt doppe šaddá oahpahus ja dilli, ovdal go ieš álgá joatkkaskuvlii. Govven: Iselin Skum
– FIIDNÁMUS LATNJA LEA VÁLDOLATNJA: Ole Herman Hætta sávvá ahte oahppit besset boahtte skuvlajagi mielde fárret ođđa skuvlavistái vai beassá vásihit movt doppe šaddá oahpahus ja dilli, ovdal go ieš álgá joatkkaskuvlii. Govven: Iselin Skum

Son lohká iežas goitge illudit earáid ovddas geat besset máŋga jagi ain joatkit ođđa skuvlavisttis.

– Mu mielas orru hui buorre šaddame, huksenbargu ovdána oba jođánit. Lea somá leahkit okta dain áidna ohppiin gii beasan dáppe dál fitnat. Olbmát leat sihtan mu govvet ja «snappet» sidjiide makkár dáppe lea, lohká Ole Herman.

Son lohká leamaš earenoamáš miellagiddevažžan oaidnit vistti váldolanja gos lea alla dáhkki ja mii addá buori dovddu. Ole Herman lei maid sávvan beassat oaidnit movt vuojadanlatnja šaddá, muhto dohko ii lean vejolaš gussiid váldit dán vuoru snihkkenbargguid geažil.

ČUOVGAT: Ođđa skuvlavisttis leat klássalanjain máŋga ja stuora láset mat addet buori čuovgga. Guossit, ja earenoamážit oahpaheaddjit, besse govvidit movt oahpahus šaddá dáin lanjain. Govven: Iselin Skum
ČUOVGAT: Ođđa skuvlavisttis leat klássalanjain máŋga ja stuora láset mat addet buori čuovgga. Guossit, ja earenoamážit oahpaheaddjit, besse govvidit movt oahpahus šaddá dáin lanjain. Govven: Iselin Skum
-Almmuhus-