Lávvordaga šadde evakueret 17 olbmo maŋŋel go geađggit firre fylkkageaidnu 889 nala Ávanuoris. Dál leat olbmot beassan fas ruoktot.
Oassi joavkkus geat šadde evakueret lávvordaga Ávanuoris, leat beassan fas ruoktot fárret. Geologa lea leamaš báikkis gos uđas lea fierran, ja son dohkkehii ahte oassi joavkkus oažžu fárret fas ruoktot.
Besse fárret fas
17 olbmo šadde evakueret go geađgeuđas fierai fylkkageainnu 889 badjel, Ávanuoris lávvordat eahket. Ii okta ge olmmoš roasmmehuvván dáhpáhusas.
Geologa finai uđasbáikkis sotnabeaivvi, ja konkluderii ahte oassi joavkkus besse fas fárret ruoktot. Finnmárkku politiijaguovlu fas dieđiha Twitteris ahte olbmot geat orrot dain viesuin mat leat juste vulobealde uđasbáikki, leat áin evakuerejuvvon.
Uđasekspearta Kjetil Brattilien lohká NRKii ahte guovlu gos uđas lei, ii leat vel stabiila.
– Dáppe lea ovdal leamaš uđas, ja boahtá fas leahkit uđas, lohká Brattlien. Son jáhkká ahte uđassihkkarastin sáhttá gádjon heakkaid.
– Jus ii livčče uđassihkkarastin, livčče sihkkarit moadde viesu mannán uđđasa mielde, lohká son.
Olles vahkku steaŋggas
Ii leat vel sihkar man guhka luodda boahtá leat gitta. Luodda lea áidna geaidnu mii mánná Ávanuorrái. Politiijat ja Siviilasuodjalus doalahit guovllu gitta mánnodahkii.
– Sáhttá steaŋggas olles vahkku, muhto diehtit eambbo disdaga, lohká Torkjell Johnsen Stáhta geaidnodoaimmahusas.
Biillat eai beasa Ávasullui, muhto lea biddjon fanas mii manná sullo ja gátti gaskkas. ©NTB
