Mariann Wollmann Magga lohká odne lea beaivi goas berre čájehit solidaritehta eará álgoálbmotnissoniidda geat eai leat olahan seamma guhkás go sámi nissonat.
Mariann Wollmann Magga lohká odne lea beaivi goas berre čájehit solidaritehta eará álgoálbmotnissoniidda geat eai leat olahan seamma guhkás go sámi nissonat.
– Mu mielas leat ollu dehálaš áššit, muhto odne berre čalmmustahttit eará álgoálbmotnissoniid geat eai leat olahan nu ollu go mii, lohká boazodoalli ja Bargiidbellodaga sámediggeáirras Mariann Wollmann Magga. Son muitala iežas jo nuorran álgán čalmmustahttit beaivvi, ja odne maŋŋágaskabeaivvi áigu iežas nieiddain boradit olgobáikkis ja ságastit dásseárvvu birra.
Unnán nissonat boazodoalus
Mariann Wollmann Magga mielas lea otná beaivi dehálaš, ja vásiha ahte sámi nissoniin leat hástalusat.
– Boazodoalus ovdamearkka dihtii eai leat eará go 13 proseantta siidaoasseeaiggádiin nissonat. Nissonat eaiggáduššet dušše 21 proseantta Norgga bohccuin. Dákkár logut čájehit munnje ahte lea ain guhká ovdal go olahat dásseárvvu. Eanandoalus leat seamma hástalusat, lohká Magga.
Loga maid: – Eat leat vel olahan dásseárvvu
Dehálaš čalmmustahttit dásseárvvu
Magga lea čielggas das ahte nissonolbmuid ferte árvvus atnit ja ealáhusain láhčit saji sidjiide.
– Dásseárvu lea dehálaš fáddá ja dan lea dehálaš čalmmustahttit, loahpaha Magga.