NRK Sápmi ja Ávvir leaba bivdán listtonjunnošiid geat oassálastet sámedikkeválggaide 2017, vástidit moadde gažaldaga iežas birra. Dá lea okta kandidáhtain:
NRK Sápmi ja Ávvir leaba bivdán listtonjunnošiid geat oassálastet sámedikkeválggaide 2017, vástidit moadde gažaldaga iežas birra. Dá lea okta kandidáhtain:
Válgabiire: Ávjovári válgabiire
Bellodat: Johttisápmelaččaid listu
Namma: Berit Marie P. E. Eira
Ahki: 49
Siviiladilli: Náitalan
Eatnigiella/giella: Sámegiella
Beroštumit:
Makkár astoáigedoaimmat leat dus?
– Duodji, guollebivdin, mánáidvaláštallan.
Mii lea dat stuorámus maid leat vásihan eallimis?
– Mu njeallje máná ja mu golbma áhkkuba.
Maid dagat go áiggut vuoiŋŋastit?
– Vuoiŋŋastit? Dasa mus ii leat dilli.
Gii lea du stuorámus ovdagovva ja manne?
– Politihkalaččat lea Ovlin Biera (Per A. Bæhr). Su erenoamáš máhttovuođuin galgat guhká ohcat ovdal gávdnat nuppi dego son.
Bargu ja oahppu
Maid don barggat dál ja makkár barggut leat dus ovdal leamašan? Makkár oahppu lea dus?
– Boazoeaiggát, politihkkár. Bargan suohkanis. Guokte jagi boazodoalloskuvla, golbma jagi gávpe- ja kantuvrraskuvla, jagi fitnodatekonomiija, golbma jagi bacheloroahppu boazodoalus, 60 oahppočuoggá árbevirolaš máhtus.
Politihkalaš duogáš
Makkár bellodagaid leat don ovddastan? Leatgo leamašan sámediggeáirras?
– Leamaš birrasiid 32 jagi politihkas, 20 jagi sámepolitihkas. Lean ovddastan Johttisápmelaččaid listu.
Váibmoáššit
Makkár áššiide áiggut bidjat fokusa?
– Boazodollui, oahpahussii ja gillii.
Mii lea du mielas eanemus hástaleaddjin maid Sámediggi ferte čoavdit čuovvovaš áigodagas?
Evttohas ii leat vástidan gažaldahkii.
Čilge manne/ manne eai galggašii minerála- ja ruvkefitnodagat oažžut lobi ásahit ja álggahit doaimmaid sámi guovlluin?
– Jus lea hehttehussan boazodoalloealáhussii, de lean vuostá.
Čilge doaibmá go dálá boazodoallopolitihkka vai ii. Mii šaddá deháleamos ášši mii guoská boazodollui čuovvovaš áigodagas?
– Stáhta badjelgeahččá. Deháleamos šaddá oažžut ruovttoluotta iešmearrideami mii boazodoalus lea.
Eanandoallu, maid sáhttá Sámediggi dahkat sihkkarastin dihte ahte nuorat sáhttet joatkit/ álgit ealáhusain?
– Ferte buoridit rámmaeavttuid, kurssaid lágidit ja doarjut.
Mii lea dat stuorámus hástalus guolástanealáhusas Sámis? Maid sáhttá sámediggi dahkat nu ahte dat unnimus doalut maid sáhttet birgejumi viežžat guolásteamis?
– Doarjut daid buot vejolaš vugiiguin.
Sámegielat, movt berre Sámediggi láhčit dili nu ahte nannejuvvojit čuovvovaš áigodagas?
– Ferte geavahuvvot BUOT arenaiguin ja ii ábut vajáldahttit giellafokusa sámi guovddášguovlluin.
Makkár ođđa bargosajiid leat dehálaš vuoruhit čuovvovaš áigodagas?
– Turisma geaseáiggi.
Guhte ášši lea čuohcan dutnje eanemusat ja manne?
– Boazodoalloáššit. Manna beare ollu bargu bealuštit boazodoalu, ja unnán áigi ovddidit boazodoalu.
