Muhtun báikkiin máksá dál bensiidna 17 ruvnno lihtteris. Boazodoalli Johan Aslak Logje mielas lea dat beare divrras, ja lohká ahte boazobargguin ferte jurddašit gokko vuodjá, vai ii golat bensiinna.
Jahkemolsašumis lassánii divat bensiinnas, mii dagahii ahte bensinhattit maid lassánedje. Dál máksá muhttin sajiin bensiidna measta 17 ruvnno lihtteris.
– Dat lea beare divrras, lea áigá juo mannan ráji badjel, maid gierdá, lohká boazodoalli Johan Aslak Logje.
Son lea Cohkolat boazodoalli, Guovdageainnu oarjjabealis. Son ballá ahte divrras bensiidna sáhttá vaikko váikkuhit nu ahte doaibmanjuolggadusat eai dollojuvvo.
– Dál šaddá juohke mohki jurddašit olmmoš gokko vuodjá. Dat mii lea bahá, ahte olbmot álget mannát seastinmodusii, ja eai šatta vuodjit nu movt galgá. Dat sáhttá dagahit ahte eai nagot doallat ealuid čoahkis, ja sáhttet masttadeamit maid šaddat.
Logje lohká ahte boazodoalli šaddá dáinna divrras bensiinnain measta juohke beaivvi bidjat bušeahta, olu gierdá vuodjit.
– Ii leat leaika go okta 25-lihtter lihtti máksá olu badjel 400 ruvnno. Ii dainna vuoje beare guhkas ovdal lea guorranan, lohká son.
– Ášši man NBR ferte čoavdit
Go otná ráđđehus stivregođii, de čáliiga Olgešbellodat ja Ovddádusbellodat šiehtadusa, man vuođul galget stivret politihka. Dan šiehtadusas čuožžu earret eará ahte boazodolliin ja boanddain galgá ovttalágan divat doaibmareaidduin.
– Dat ii doala deaivása. Ráđđehus mii dál čohka, logai ahte boazobargiide galgá divat hálbut.
Logje lohká dán ferte Norgga Boazosápmelaččaid Riikkasearvi (NBR) njulget boazodoallošiehtadusa šiehtadallamis.
– Dás ferte sierra doarjjaortnet mii gokčá haddegoargŋuma bensiinnas. Bensiidna lea maid juohke boazobargi muitá juohke beaivvi, ja dat lea dakkár mii vuorjá juohke beaivvi. Dieđán go NBR dál álgá šiehtadit, ja namuha divvaga, de lohká Stáhta ahte dat lea mielde njuolggo-doarjagiin. Dan lea lohkán juohke háve go NBR lea dan gáibidan. Go nu lea, de mun meinen NBR galggašii dál sihtat eambbo doarjagiid, ja dainna ákkastallat.
Fargga almmuhuvvo evttohus šiehtadussii
NBR ja Stáhta álget fargga šiehtadit boazodoallošiehtadusa 2017/2018 boazodoallojagi ovddas. Álggos galgá NBR buktit sin evttohusa, dat almmuhuvvo boahtte vahkku.
NBR nubbinjođiheaddji Per John Anti ii sáhte muitalit mii sin gáibádusas čuožžu. Šiehtadallanlávdegoddi lea ráhkadan gáibádusa. Stivra ja ovdaolbmot galget čoahkkinastit, ođđajagimánu 10. beaivvi, ja dohkkehit gáibádusa.
– Mii leat vuos bargame gáibádusain, mun in duostta lohkat maide vuos maid mii coggat gáibádussii, ovdal lea almmolaš.
Anti lohká sii leat gal evttohan juoidá juste dan bensiinna dáfus, muhto ii áiggo muitalit mii dat lea.
(Ášši joatká gova vuolábealde)
Anti muitala sii leat olu jagiid bargan juste dan divat-osiin šiehtadallamiid oktavuođas. Sis lea mihttu oažžut vuojániid, nu go skutera ja njealjejuvllagiid bargoneavvun, ja oažžut daid divvagiid eret. NBR áigu maid ahte boazodoallu galgá buohtastahttojuvvot eará vuođđoealáhusaiguin.
– Dál mii oaidnit loktana bensinhaddi, ja dasa boahtá vel juoga maid bidjat gáibádussii. Mis lea bargu leamaš jođus, okte válljejuvvui divat-lávdegoddi, ja sii barge moadde jagi dainna. Doalvvuimet gáibádusa finánsadepartementii, muhto eai leat čuovvolan min gáibádusaid vuos.
