-Almmuhus-
-Almmuhus-
-Almmuhus-
OĐĐASATBelohahkii duđavaš sátnejođiheaddji vástádusain

Belohahkii duđavaš sátnejođiheaddji vástádusain

-

-

Kárášjohkalaš Egil Utsi geavahii otne álbmoga vejolašvuođa jearrat gažaldagaid Kárášjoga gieldastivrras.   Son gažadii sátnejođiheaddji Svein Atle Somby áššis mii guoská Finnmárkkukommišuvnna vuoigatvuođačielggadeapmái Kárášjoga guovllus.

– Mun jerren maid áigot dahkat áššin. Áigu go gielda lágidit vuoigatvuođaseminára iežas álbmováljjejuvvon olbmuid várás. Nu ahte sii buorebut áddejit mas lea sáhka ja dan vuođul dahket buriid mearrádusaid Kárášjoga álbmoga ovddas.  Mearrádusat mat dál dahkkojit bohtet maiddái ávkin min maŋisbohttiide, dadjá kárášjohkalaš Egil Utsi.

Áigemearri Kárášjogas ovddidit vuoigatvuođagáibádusa Finnmárkokommišuvdnii lahkona. Kommišuvdna lea dál guorahallamin Kárášjoga guovllu, ja álbmogis lea vejolašvuohta ovddidit vuoigatvuođagáibádusa guovlluide.

 

Sátnejođiheaddji vástádus

Kárášjoga sátnejođiheaddji Svein Atle Somby vástidii Egil Utsi gažaldaga ná:

– Gielda ii leat vuoigatvuođaguoddi,  muhto gieldda álbmot. Lea gieldda álbmot mii lea áiggiid čađa huksen alcceseaset vuoigatvuođaid, áiggiid čađa geavaheame bokte. Kárášjoga gielda ii sáhte mearridit gieldda álbmoga ovddas dahje ovddidit vuoigatvuođagáibádusa. Mearrádus ovddidit gáibádusa ferte son dahje sii geat oaivvildit sis lea vuoigatvuođat, vástida sátnejođiheaddji Somby.

 


Kárášjoga sátnejođiheaddji Svein Atle Somby

 

Lágidit álbmotčoahkkima

– Gielda boahtá lágidit álbmotčoahkkima, gosa maid bovdet láhkačehpiid boahtit.  Doppe lea olbmuin maid vejolašvuohta jearrat gažaldagaid.  Min mielas lea dehálaš ahte sii geaidda dát guoská  ožžot eanemus dieđuid proseassa birra mii dál lea jođus, nu ahte sis leat doarvái dieđut áimmuhuššat iežaset beroštumiid, čállá Somby vástádusa.

 

Ruhtadit

Kárášjoga gielda maid árvvoštala juolludit ruhtadoarjaga veahkkin sidjiide guđet áigot ovddidit gáibádusa, čállá sátnejođiheaddji.

 

Belohahkii duđavaš

Egil Utsi lea duđavaš go sátnejođiheaddji vástidii su gažaldagaide, muhto lohká iežas belohahkii duđavaš vástádusain.

– Ožžon vástádusa ja ean belohahkii duđavaš, lohká son Ávvirii.

-Almmuhus-